nm 在處理器上代表甚麼？
nm 中文叫做納米，好多公司都會用到納米技術，去測量處理器中相鄰晶體管之間嘅距離，又或者平板電腦、筆電、手機中所用晶體管嘅尺寸，唔同類型嘅處理器，都係用 nm 來測量，而數字就用嚟表示晶體管與 CPU 中其他零件之間嘅距離。如果數量好細，例如 4nm、5nm 等等，意味住相同面積上，可以放置更多嘅晶體管，令處理器更高效、更快，同時亦能帶來更低功耗，晶片尺寸更細。例如你將台積電 7nm 處理器同 14mm 處理器進行比較，7nm 處理器喺既定空間入面，擁有更多嘅晶體管，意味住 7nm 處理器比14nm 處理器消耗更少嘅電量，並且具有更快嘅計算能力。
簡單嚟講，一般我哋嘅理解，nm 數值愈細，就代表愈能慳電，消耗更低嘅能量，同時喺運算能力方面亦會更佳。所以，紅米 12 5G 用上 4nm 嘅 Qualcomm Snapdragon 4 Gen 2 處理器，唔單止意味住會有更佳嘅省電能力，同時性能方面都唔會太差，根據資料顯示，呢粒 Snapdragon 4 Gen 2 處理器，安兔兔跑分可以拍得上 Snapdragon 860，大約為 54 萬分。
紅米 12 5G 用 4nm 制程 CPU 有乜好處？
紅米 12 5G 所用嘅 Qualcomm Snapdragon 4 Gen 2 處理器，架構為 Qualcomm Kryo 2.2GHz Cortex-A78 x 2 + 2GHz Cortex-A55 x 6，由三星生產代工，相比起上代嘅 Snapdragon 4 Gen 1，由 6nm 升級至 4nm，性能亦相比上代提高咗 10%。而按照上面嘅講法，紅米 12 5G 用 4nm 制程 CPU 帶來嘅好處，包括：
001：更高嘅晶體管密度：同一個面積之下可以裝到更多晶體管，達至更好嘅性能。
002：較低嘅功耗：nm 數值愈低，亦代表咗會更加慳電。
003：速度更快：如果晶體管之間距離縮短咗，可以有助晶體管工作得更快。
004：更少嘅熱量散發：因為電子喺有效工作之前唔需要移動太多，而且晶體管之間距離好接近，所以所散發出嚟嘅熱量亦會更少，理論上降低出現手機發熱嘅問題。
資料參考：VYRIAN