Ulefone Armor 22 開賣！256GB 都只係 $1499！有 6600mAh 大電 + 三防

左定坤 (Cho Ting Kwan) 2023-10-10 23:29 | 手機綜合區

如果你係成日唔小心跌電話，或者喺地盤工作，你可能需要一部夠硬淨，唔怕跌嘅三防手機，而講到市場上有推出三防手機嘅品牌，其中一個性價比高嘅選擇，應該係 Ulefone。最近 Ulefone 一部全新三防手機 ARMOR 22 喺香港推出，賣價只係千零蚊，襟跌之餘，真係不幸跌爆芒都唔肉赤，你又會唔會考慮呢？睇下文啦！

Ulefone ARMOR 22 香港賣價及上市資訊

Ulefone ARMOR 22 即日起喺香港上市，有 8GB + 128GB 以及 8GB + 256GB 兩個儲存容量版本，建議零售價分別為 $1399 以及 $1499，從價錢上嚟睇，一啲都唔貴。

Ulefone ARMOR 22 硬件規格

而呢個千零蚊嘅價錢，可以有乜規格嘅手機？首先 ARMOR 22 具有 6.58 吋 FHD+ 屏幕，支持 120Hz 屏幕刷新率，整體設計好似佢哋以往嘅三防手機一樣，除咗支持 IP68/IP69K 防塵防水功能，仲有 MIL-STD-810H 軍規防撞保護。不過，雖然佢其中一個賣點係「Slim Style」，但望落去似乎都係唔 Slim，算係比較笨重嘅類型。

另外，ARMOR 22 配備 MTK Helio G96 處理器，電池容量為 6600mAh，而相機部分則具有 6400 萬像素夜視鏡頭 (Night Vision) 以及 6400 萬像素廣角鏡頭，支持水底拍攝功能，前置鏡頭則為 800 萬像素。另外，手機支持紅外線，具有手套模式。





至於差不多價位嘅香港行貨手機，又有乜嘢選擇呢？其他呢個價位嘅手機，當然無好似 Ulefone ARMOR 22 有三防設計啦，不過如果單從規格嚟比較，我哋可以按呢度或按下圖進入 ePrice 手機比拼系統，等大家睇下千四五蚊嘅手機，有咩選擇同埋佢哋嘅規格比較。你亦可以自行加入其他型號嘅手機，進行進一步嘅比較參考。