免密碼、更安全！教你用 Passkey 用指紋 / 面容登入 Google 帳號

左定坤 (Cho Ting Kwan) 2023-11-07 21:17 | 手機綜合區

為防駭客以及釣魚攻擊，Google 早前推出咗 Passkey 嘅登入方式，可以讓用家唔使密碼，淨係用指紋 / 面容，就可以登入，而且登入速度更比傳統方式快 40% 之多。然而，其實 Passkey 並唔係 Google 專利，Apple 都一樣有，而呢個功能係由 Google、Apple 聯合推出嘅一種新標準，旨在提升用家嘅體驗同埋系統安全性。而點樣可以透過 Passkey，用指紋或者面容去登入 Google 帳號？呢篇文章版主教你。看下文吧！

內文.jpg

Step by Step 教你使用 Passkey 登入 Google 帳號

Google、Apple 聯合推出新標準，叫做 Passkey，中文叫「密碼金鑰」，係一種免密碼登錄嘅功能，以取代傳統密碼方式。而透過呢個 Passkey 功能，用家可以淨係用指紋、面容辨識或屏幕解鎖 PIN 碼，就可以登入 Google、PayPal、Shopify 等平台。Passkey 提供單獨身份驗證，每次加密都唔同，呢啲資訊淨係儲存喺用戶嘅裝置度，唔會好似雲端儲存嘅密碼咁容易被釣魚攻擊，變相比傳統密碼輸入更安全。

而到底點樣可以打開 Passkey，等你可以唔使密碼登入 Google 帳號呢？其實無論你係用 Android 手機、iPhone 定係電腦瀏覽器，方法都係大同小異。而以下版主就用我手上嘅 iPhone 13 mini 去為大家做一個簡單教學：

001：打開 Gmail (經實測並唔係個個 App 嘅瀏覽器都得，例如如果我用 Google Maps，會顯示此裝置不支援)。

002：點選右上方嘅頭像，然後按「管理你的 Google 帳戶」。

003：進入「安全性」，點選「密碼金鑰」。

004：輸入你的密碼。

005：選擇「建立密碼金鑰」。

006：點選「繼續」，之後會問你是否允許用 FaceID 登入，按「繼續」。

007：密碼金鑰建立完成。

008：之後你會見到你建立的密碼金鑰。

009：當你要用同一個瀏覽器登入 Google 帳號時，就可以直接用 FaceID 登入了。