〔評測〕ChatGPT App 同 AI 語音傾計 好玩過 Siri！免費版都玩得到，立即同你一齊玩
左定坤 (Cho Ting Kwan)
2023-11-22 22:39
|
手機綜合區
AI 時代，人人都要學，尤其 ChatGPT，識用真係幫到我哋工作好多。而今日 ChatGPT 推出咗一個好好玩嘅功能，叫 ChatGPT Voice，就算唔洗課金 ChatGPT，淨係免費版都玩得到，畀你可以同 AI 用語音傾計，比起 Siri 好玩好多，到底呢個功能點玩，等我哋一齊玩下啦！
ChatGPT 加入了 Chat with voice 功能
OpenAI 宣佈向用戶免費推出 ChatGPT Voice，無論係 Android 定係 iOS 上嘅 ChatGPT App，都可以玩得到。喺 ChatGPT 對話欄嘅右邊，會見到多咗一個好似「頭戴耳機」嘅圖標，只要撳一下呢個圖標，就會見到「Chat with voice」嘅介紹，選擇一把鍾意嘅聲音，ChatGPT Voice 就可以用返語音，回應返你。
支持多個語言，包括中文，但......
目前呢個功能支持多個語言，預設係「Auto Detect」，自動用佢覺得合適嘅語言去回應你，不過你亦可以喺設定度搵到「Main Language」，其中包括「Chinese」，雖然都係叫「中文」，但大家都知啦，好多時都係寫明「Cantonese」，先會支持廣東話，所以如果你用廣東話問佢問題，佢雖然可以理解得到，但佢預設係會用普通話回應你，除非你有特別要求，叫佢用廣東話答你，但答完之後，把聲有點兒...... 怪怪的，真係好似一個講開普通話嘅人，格硬好努力用廣東話同你溝通咁，但都好好笑，下面段影片會示範畀大家睇，可能大家都會笑到停唔到口！
用課金版可以問到同時下話題相關嘅資料
雖然呢個 ChatGPT Voice 功能，免費版都一樣可以用到，但課金版同免費版，依然都係有分別，就係如果你係課金版，佢會可以連接互聯網，搵到同時下話題相關嘅資料，例如問佢今星期香港流行榜嘅冠軍歌曲係邊首，佢都可以答到你，但同樣無辦法用純正廣東話去答你。不過呢個功能係好玩，但暫時處理速度比較慢，問完 Prompt 要佢等一段時間，先至答到你，希望過多一陣子，OpenAI 可以再進一步將答題嘅速度大大提高！
最後，我哋送上 ChatGPT Voice 嘅示範影片：
