Energizer 及其合作夥伴 Avenir Telecom 在 MWC 2024 上推出咗一款配備 28000mAh 大電池嘅智能手機，賣點係核電同埋好堅固耐用，個名叫 Hard Case P28K，外觀望落去似磚頭，據官方宣稱，呢款手機嘅通話時間為 122 小時，即係大約 5 日時間，而待機時間則為 2253 小時，相當於三個月多啲，根據外媒測試，一次充電喺正常使用情況下，可以用到一星期。
手機相當笨重，重 570g，即係超過 1 磅，厚度為 28.8mm，大約係 1 吋，佢嘅尺寸係普通 iPhone 15 嘅三倍以上，你可能以為咁大舊電，需要叉電叉到 2046，實際唔使，佢支持 33W 快速充電，大約可以 1.5 小時內就充滿電。
Hard Case P28K 配備 6.78 吋 LCD 屏幕，可以輸出 FHD+ 影像，背面係三鏡頭設計，由 64MP + 20MP + 2MP 鏡頭組成，目前未知最後兩個鏡頭係咪超廣角 + 潛望鏡。而手機配備 Helio G99 處理器，內置 8GB RAM 以及 256GB ROM，並支持 1TB 儲存空間，防護等級為 IP69，意味住佢完全唔受灰塵影響，並且可以喺水下浸好長時間。手機會預載 Android 14 作業系統，預計會在今年 10 月全球發售，售價為 249.99 歐元，折合港幣約 $2115.08。