【2024 四月】四大主要網絡商 5G 入門計劃比拼！呢間網絡商 30GB 貴過 50GB 咩玩法

左定坤 (Cho Ting Kwan) 2024-04-08 19:19 | 手機綜合區

講到網絡商月費計劃，無論唔同年齡層，無論係幾時幾刻，只要合約差不多到期，都可能需要留意一下，到底而家有咩網絡商嘅月費計劃抵玩。而隨住愈來愈多人換上了 5G 手機，就連家中兩老都係用 5G 手機時，5G 月費計劃就愈來愈多人關注。因此，這篇文章版主就會集中講下唔同網絡商嘅入門 5G Plan，畀大家了解下而家網絡商門檻最低嘅係邊一間，月費幾多。睇下文啦！


 

香港四大主要網絡商

中國移動香港 CMHK

講到香港四大主要網絡商，一般都係講緊中國移動香港 CMHK、csl / 1010、3HK 以及 SmarTone，其中一向 sell 抵玩嘅，非 CMHK 莫屬。而比較現時佢哋最抵玩嘅 5G Plan，相信應該係「5G 體驗 20 服務計劃」，月費 $125，簽約 24 個月，包每月 20GB 本地 5G 數據 (其後 1Mbps 任用) 以及 1GB 中國內地及澳門數據，攜號轉台可免 $18 行政費。

# 唔計附送嘅漫遊數據，平均 $6.25/GB。

csl

講到 csl，雖然一般畀人印象係月費頗貴，但其實計返並唔係，最低門檻係 30GB Plan (其後 1Mbps 任用)，月費原價係 $298，但因為本身「期間限定」有每月 $100 月費回贈，即實際上係每月 $198。而如果簽約 24 個月，就有額外 2 個月月費回贈，即平均每月 $182；而簽約 36 個月，就有額外 6 個月月費回贈，即平均每月 $165，並且每月包 3GB 中國內地及澳門數據，計返每 GB 嘅價錢，csl 可能比起 CMHK 更平，但如果你本身無必要用到 30GB 咁多，CMHK 就相對入門門檻低啲。

# 唔計附送嘅漫遊數據，平均 $5.5/GB。

SmarTone

SmarTone 比較主攻大容量嘅計劃。留意返佢哋官方網站，SmarTone 5G 計劃入門門檻係 110GB，基本月費 $298。如果簽約 24 個月，上台優惠可以選擇每月 10GB 中國內地及澳門數據組合及每月 200 分鐘中國內地及澳門漫遊通話分鐘，又或者可以揀 35GB 亞太地區漫遊數據及 2GB 中國內地及澳門數據組合；而如果簽約 28 個月，則會送 70GB 亞太區漫遊數據及 100 分鐘中國內地及澳門漫遊通話分鐘。

# 唔計附送嘅漫遊數據，平均 $2.71 / GB。

3HK

3HK 5G Plan 最入門嘅係 30GB，基本月費係 $124，簽約 24 個月，包 3000 本地通話分鐘，而 30GB 之後則可以 1Mbps 無限任用。如果你係 Citi 信用卡客戶，可專享額外 10GB 數據，而如果你係易賞錢客戶，也可獲得額外 3GB 本地數據以及 800 易賞錢積分。但要注意魔鬼細節，呢個 Plan 需要行政費，而且唔係 $18，而係 $28，變咗實際每月要 $152，倒不如 Join $148 50GB Plan，攜號轉台仲有得免行政費，Citi 信用卡仲有得享額外 17GB 數據，加埋即係有 67GB 仲抵玩。所以，雖然 3HK 最入門嘅係 30GB + 10GB Plan，但以月費嚟講最低門檻應該係 50GB + 17GB Plan 先啱。

# 唔計附送嘅漫遊數據，平均 $2.21 / GB。