最平 $98 有 10GB 中港澳數據 + 三地通話分鐘！可升級一卡兩號，最大賣點係冇限期

左定坤 (Cho Ting Kwan) 2024-04-12 19:07 | 手機綜合區

近年開始多返唔少人會喺空閒時間北上消費，除咗去玩、去食，有唔少人會上去 shopping，例如早排多咗好多人去山姆、Costco 之類，而如果返大陸，你都需要一張上網卡。版主自己就好簡單，反正每個月都用開 SoSIM，我會選擇直接開埋個 $138 內地 / 澳門 / 台灣一年 Plan，呢個 Plan 包 10GB 數據，一年內隨時返大陸、台灣用都得。然而，最近有網友就同我 share 咗一張中港澳嘅儲值卡，而呢張儲值卡嘅賣點，係「不過期」，見到呢個賣點都幾有 gimmick，版主就想同大家分享一下！

賣點 (一)：不過期

講緊嘅係中國電信推出嘅「一卡兩號大灣區儲值卡」，面值 $100，有三個數據用量嘅 Plan 選擇，分別為 $98 10GB、$188 20GB 以及 $288 40GB，三個 Plan 都係送 100 三地通話分鐘，一張卡可以三地共用，最大賣點係「不過期」，今個月有剩，就留返下個月用，無「有效期」嘅限制，直到用完即止。另外，而家佢哋都有激活優惠，可以 $10 購買 3GB 三地共用「不過期」數據包，只需編輯短訊內容「10」發送至「1745678」就可以購買，每張卡只限購買一次。

賣點 (二)：可升級一卡兩號

呢張 SIM 另一個賣點，係可以升級一卡兩號，但呢個賣點吸引力，似乎就唔及「不過期」吸引，主要係唔平，每日 $1，即係一個月 $30。睇返 SoSIM 開個大陸號碼，$19 / 月，咁似乎就輸蝕啲。不過 SoSIM 一卡兩號又無漫遊通話分鐘，而呢張中國電信 SIM 就有咁解囉，但 $30 / 月都唔及出面其他網絡商抵玩。

需要香港實名登記

由於呢張儲值卡係香港儲值卡，當然你去到大陸一樣可以照用 Facebook、YouTube、WhatsApp，不受限制，但亦因為佢係香港儲值卡，你一樣係需要跟返香港政府規定，要進行實名登記，先可以用到，呢個要注意了。

邊度買到？

至於呢張 SIM 可以邊度買到呢？留意到中國電信網站，係無網店之類可以畀你買到，而曾經香港有過門市，但而家都無哂。所以想買呢張卡，版主打電話去問過，只可以喺深水埗鴨寮街度買到，表示應該好多舖都有咁話。

最後，按呢度可以去中國電信網站，了解更多詳情