香港品牌 MOMAX 開設首間專門店
MOMAX 將佢哋嘅「第一次」,奉獻咗畀香港國際機場,將目標面向一眾外遊人士,或者準備離港去旅行嘅香港人。而呢間舖位於一號客運大樓 F 行櫃位附近,即係未入禁區嘅位置,有時早到機場 Check in 完,無嘢做可以去逛下。雖然間舖就唔算大,而且並無將所有 MOMAX 產品放哂出嚟,但去旅行所需嘅配件,例如尿袋、旅行轉插、PinTag / Pin Card (總之都係類似 AirTag 嘅東西)、磁能線、拖板等等,都一樣可以喺呢間舖買得到。
而呢間舖有兩大特色位,第一個特色,係佢哋有將新年推出限定版嘅尿袋放出嚟賣,呢個尿袋用上鈦金屬設計,上面配合龍年有「龍」嘅圖案,並且有唔同國家地區選擇,例如「香港」、「東京」、「倫敦」等等,而作為香港人,對於「香港」呢兩個字,應該會比較有情義結;而第二個特色,就係佢哋提供刻名服務,你可以喺購買返嚟嘅尿袋上,刻上你想刻嘅文字,就好似版主我,就喺一個 Momax 10000mAh 尿袋上,刻上咗「ePrice.HK」嘅字,即刻將我個尿袋變得獨一無二。暫時只有機場專門店,先有刻名服務,但聽聞嚟緊之後會將呢個服務,下放到某部份嘅銷售地點,到時大家就可以留意一下了。
▲ 特色之一,就係呢組特別版嘅尿袋。
▲ 特色之二,有現場刻名服務。
▲ MOMAX 行政總裁鄭冬生 (John Cheng) 早前都有親臨呢間專門店拍攝宣傳影片。