要用 VPN + Facebook account 就可以免費任用
Meta AI 突發推出，同 ChatGPT 一樣可以生成文字同 AI 圖像，如果你想試玩 Meta AI，好簡單，其實只要你有 VPN 就得 (抵玩買 VPN 方法，教過好多次無理由唔識用 ShopBack，就算呢期無優惠，都仲有 50% 回贈)，然後去 meta.ai 網站，用 Facebook account 登入即可。
識「戴頭盔」：非英文嘅 Prompt 尚有改善空間
版主自己都有簡單試玩過，當唔知咁問下佢，係咪用緊 ChatGPT 嘅語言模型，而 Meta AI 表示佢唔係用 ChatGPT 嘅語言模型，佢係由 Meta 開發嘅 AI 助手，擁有自己嘅語言模型同埋生成能力，雖然佢都係大型語言模型，但佢嘅架構同埋訓練數據同 ChatGPT 唔同。佢被設計成更加可互動、更知識淵博同埋更幫得手 (佢自己講啫)，並會基於用戶互動不斷學習和改善。以上嘅問題，我係用廣東話口語問佢，而佢係可以識別到我嘅語言，但佢回應起上嚟就中英夾雜，先英文，再後面括住中文嘅翻譯，最後好人性化咁戴哂頭盔，話佢仲改善緊非英文嘅指令，處理問題嘅時候可能會有 Error，如果你用英文同佢講嘢，就會好幫得手咁話喎。
▲ 佢係 Meta 自己開發嘅 AI 助手。
▲ 叫佢計劃行程都得。
仲可免費玩 AI 圖，變埋動畫都得！
至於本來喺 ChatGPT 要課金先用到嘅生成圖片功能，喺 Meta AI 唔需要，而且質素都有返咁上下，仲可以針對生成出嚟嘅圖片，編輯指令同埋將圖片變成動畫，但可惜唔係 gif 圖，而係 mp4 檔，但都係幾好玩嘅。
▲ 質素都算係咁，應該勉強拍得住 Dall E (初步睇)。