扮 WeChat 發短訊呃你撳假 Link
今時今日，真係做乜都要小心，如果唔係一個唔覺意，真係畀人呃咗都唔知！最難捉摸嘅係，好似今日我收到呢個詐騙 SMS 咁，佢 Sender ID 係寫住 WeChat，內容係講「因您微信資金安全保險將到期，即日起每月扣費 2000 元合計 3 年 72000 元。如無需使用該保險請聯係客服關閉免造成扣費」，然後後面一個假 Link，我就唔打出嚟了。我嗰個假 Link 其實就好明顯，但我朋友嗰條 Link，又好似係 WeChat，但又少咗個 a 字，變咗「wecht」，就可能會眼快快睇漏都唔定。
而因為之前我驗證 WeChat 嘅時候，都同樣係用 WeChat 呢個 ID send 過驗證碼畀我，如果真係一個唔小心無留意，分分鐘好易中招！
根據 WeChat Pay Hong Kong 嘅講法，最慘香港目前係無一個要求註冊或者登記 Sender ID 嘅制度，所以騙徒就利用呢點，去模仿一啲品牌名去 send 假訊息，然後手機就會自動將釣魚 SMS 同之前發送過嘅正常 SMS 合併埋一齊。咁呢個就解釋咗，點解會同之前正常 SMS 撈埋一齊。
最後提醒大家，見到可疑 SMS 叫你撳可疑 Link，千祈唔好亂咁撳，因為好大機會會係釣魚 Link，甚至隨時會連你信用卡資料都盜走埋！再一次提醒，記得 Share 畀身邊嘅人咪中伏喇！