用 WeChat Pay HK 搭的士都得！WeChat 宣佈聯乘八達通推全新支付方案

左定坤 (Cho Ting Kwan) 2024-08-06 14:24 | 手機綜合區

唔知係唔係呢排放假多咗北上消費，一有比較之下，我覺得大陸搭的士之類，真係比香港方便好多，唔理係唔係叫滴滴，基本上上到去求其搭車，都好少用現金，可以落車支付寶或者微信支付就得。相反，喺香港除非你用叫車 App 直接信用卡畀咗錢，如果唔係你好難求其上架的士，都可以用電子支付畀錢。最近，為推動公共交通支付工具互聯互通，WeChat Pay HK 宣佈聯乘八達通推出專為的士而設嘅支付方案，用 WeChat Pay HK 畀錢都得。想知詳情，睇下文啦！

WeChat 宣佈聯乘八達通推全新支付方案

WeChat Pay HK 宣佈聯同八達通推出全新專門為的士司機及乘客而設嘅支付方案，八達通流動收款機將增設 WeChat Pay HK (港幣錢包) 以及微信支付 (人民幣錢包) 作為支付選項，免除現金找贖帶來嘅繁瑣程序。

進行交易時，的士司機於商用版八達通 app 輸入交易金額，八達通流動收款機隨即顯示港幣交易金額及收款二維碼，而乘客只需要用 WeChat Pay HK 或者微信支付掃個 QR Code，就可以付款。對於用微信支付嘅內地旅客，車費會自動轉換成人民幣結算及扣賬，享受優於市場嘅匯率，而司機則可以直接用港幣結算及收款。

唔知呢個全新支付方案，網友又點睇呢？但返番轉頭諗，其實到底而家香港有幾多架的士會收八達通呢？我平時搭車就比較少見司機旁邊會有八達通收款機，唔知你又覺得係唔係已經廣泛咗呢？