新 App 個名叫做「就在這裡」，原意就係當你平時搵路嘅時候，搵到同人講：哦，就係呢度啦！所以個 App 就係咁樣命名。而呢個 App 我今日都用過，覺得都算幾方便，唔單止可以實時查看九巴、城巴、小巴等到站時間，而且入面仲有港鐵路線圖、輕鐵路線圖、電車路線圖等等，直澄可以取代埋港鐵 App，同時佢亦可以有埋深圳、新加坡等的地鐵路線圖，變相一個 App 可以睇到好多唔同地方地鐵圖或者巴士路線，相當方便。
同時，佢亦可以選擇一些設施，然後搵下最近的設施位置，例如圖書館、廁所等等，呢個功能又係好正，記得有時成日係條街度行緊，突然間急尿都唔知邊度有廁所，呢個 App 就可以大派用場。
另外，佢同普通九巴 App 一樣，一樣可以設定落車提示等功能，而且仲可以透過動態島去顯示，同時更可以設有小工具，唔使入 App 都能夠睇到，但呢個功能似乎就要課金訂閱咗先得，有月付 $15 或者年付 $93 兩個選擇，如果真係好用，我又覺得課金試下，唔算貴。你又點睇呢？
