科技界總動員！大埔宏福苑五級火災捐款破 1.6 億！OPPO、小米、聯想等企業齊支持

左定坤 (Cho Ting Kwan) 2025-11-28 14:24 | 手機綜合區

講到香港近日最令人心痛嘅新聞，一定係大埔宏福苑嘅五級大火！成個屋苑燒到通頂，唔少居民瞬間無家可歸，真係睇見都眼濕濕，尋日版主一返到香港，都第一時間過去幫手盡一份綿力，始終住大埔咁多年，尤其是曾經喺隔離讀書，多少都有唔少感情。災難當前，見到香港人同唔少企業嘅熱心，而科技界今次亦真係總動員，由雷軍旗下嘅小米基金會打頭陣，到騰訊、阿里巴巴、李嘉誠基金會等全部都有份捐款，連 OPPO、小米、聯想等都支持，暫時統計總額已經突破 1.6 億港元，還未計物資同技術支援！想知詳情，睇下文啦！

科技公司捐款一覽表

公司名稱	捐款金額	主要用途
小米基金會	1000萬港元	醫療救助、緊急安置、過渡期生活救援
李嘉誠基金會	3000萬港元（首批）+ 5000萬港元（後續）	支持註冊慈善機構，提供即時救助及後續復元援助
阿里巴巴集團	2000萬港元	救援及後續安置、生活物資補給、情緒疏導
騰訊	1000萬港元	緊急救援、過渡安置、生活物資補給及情緒支援
字節跳動	1000萬港元	緊急救援、過渡安置及災後社區恢復
OPPO	1000萬港元	醫療救助、緊急安置、過渡期生活援助
聯想香港	1000萬港元	緊急救援、生活物資補給、醫療救助及後續善後
微博公司	1000萬港元	緊急救援與後續過渡安置，助力災後恢復
螞蟻集團	1000萬港元	支援火災救援
比亞迪（香港）	1000萬港元	醫療救助、緊急安置及災後重建
吉利控股	1000萬港元	醫療救助、緊急安置及災後重建，並調配車輛支援應急機構
小鵬汽車	500萬港元	為受災家庭提供及時支援，協助重建生活

物資技術支援同樣重要，中國移動、京東齊幫手

以上的名單以及金額只是保守估計，據版主所知，仍有一些企業不留名、不大肆宣揚，低調的提供金錢上的援助。除咗真金白銀捐錢之外，唔少科技公司仲提供物資同技術支援。中國移動香港就提供咗免停機服務、綠色通道、免費補卡同應急充電等服務，確保災民能夠保持通訊暢通。和記電訊、csl 等就免費借出手機、SIM卡同充電器，而京東集團就透過香港佳寶超市同物流網絡運送水、食品、床單同保暖被等應急物資，呢啲支援對於災民來講同樣重要！