事件背景：用已故親人身份成功開卡
件事係咁嘅：有位網友有位親人之前過咗身，但一直未去註銷身份證。咁網友諗住，反正有個SoSIM 嘅某個 Plan 幾抵玩，不如就用親人張身份證去實名登記試吓啦，佢知咁做係唔啱嘅，但又抱住好奇嘅心去試下啦。點知，又真係俾佢成功通過實名認證，開通咗個Plan，咁就用住先。呢張 SoSIM，網友話純粹用喺平板電腦上網，從來無用呢個號碼登記過任何帳戶、網站，甚至連張 SIM 卡個電話號碼係幾多，佢自己都唔會記得，因為都無諗住要畀個電話號碼人，純粹自己上下網用。
詭異來電：對方竟能直呼全名
點知，最離奇嘅事發生咗。有一日，佢竟然接到一個打嚟呢張 SoSIM 嘅電話。佢心知九成係詐騙或者推銷，但係好奇心驅使下都係接聽咗。一聽之下，嚇咗一跳——對方一開聲，居然可以準確無誤咁講出佢已故親人嘅全名！網友當時心入面真係「打咗個突」。佢好肯定，除咗實名登記嗰一刻，從來無在任何地方用過呢位親人個名。理論上，根本無可能有人會知道呢個電話號碼，即使有人打嚟，最多都係隨機 cold call 試探下宣傳下，就算係詐騙，都無理由一講就講到人哋個名，仲要係一位已經過身嘅人。
最後，網友半講笑咁同對方講：「你要搵XXX？呢個有啲難度喎，可能你開窗跳落去會快啲。」跟住就收咗線。
網友分析：資料洩漏的兩種可能
事後佢百思不得其解，到底對方點樣「撞手神」撞到個名出嚟？佢自己分析，可能性只有兩個：一係網絡商（即係SoSIM所屬嘅電訊商）內部洩漏咗實名登記資料；一係政府相關部門嘅資料庫有漏洞，流出咗資料。而位網友自己就比較傾向係後者，覺得政府方面流出嘅可能性大啲。版主聽完呢個故事，都覺得幾「心寒」。實名制本來係為咗打擊犯罪同防止電話詐騙，但如果連最基本嘅資料庫安全都做唔好，反而可能變成資料外洩嘅源頭，咁就真係好諷刺。雖然唔排除係電訊商前線或者內部有人不當處理資料，但政府將身份資料同電訊實名系統對接嘅過程中，係咪百分百密不透風，的確值得疑問。大家又點睇呢？你覺得邊個環節出問題嘅機會大啲？你有無遇過類似嘅來電？不妨留言一齊討論下！