吹到識飛嘅 AI 經濟引擎
之前外界對 AI 帶動經濟有幾樂觀？連美國總統侵侵 (Donald Trump) 早前都喺 Truth Social 發文，話 AI 投資令美國經濟成為全球「最火熱」，仲警告各州政府唔好搞咁多監管阻住呢個「增長引擎」。有啲知名經濟學家之前都力撐呢個說法，例如哈佛大學經濟學教授 Jason Furman 曾經估算，資訊處理設備同軟件嘅投資佔咗上半年 GDP 增長嘅 92%。而聖路易斯聯邦儲備銀行嘅經濟學家亦都估計，AI 相關投資佔咗 2025 年第三季 GDP 增長嘅 39%。
高盛踢爆：完全係錯覺！
不過，高盛嘅分析師開始覺得唔對路。高盛分析師 Joseph Briggs 形容，AI 帶動經濟呢個講法「好直觀」，但反而令大家無去深究背後真正發生緊咩事。高盛首席經濟學家 Jan Hatzius 最近接受訪問時更加直言，2025 年 AI 投資對美國 GDP 增長嘅貢獻其實「幾乎係零」！佢認為外界對 AI 投資影響力嘅報導好多都係錯嘅，實際影響比大家想像中細得多，高盛亦唔覺得 AI 投資對增長有強烈嘅正面作用。
點解貢獻係零？因為肥水流向別人田！
點解美國科企掟咁多錢，美國自己無落袋？Jan Hatzius 解釋，主要原因係搞 AI 要買極大量嘅設備同晶片，而呢啲硬件大部份都係進口嘅。即係話，美國公司掟出嚟嘅錢，其實係帶動緊台灣同韓國嘅 GDP，對美國本土 GDP 幫助並唔大。
老細心聲：生產力無升過？
除咗硬件錢流出海外，AI 喺實際應用上又幫唔幫到手？目前其實仲未有可靠方法量度 AI 點樣帶動企業同消費者層面嘅經濟增長。更殘酷嘅係，好多企業高管都話 AI 未有大幅改善生產力。最近一項訪問咗接近 6,000 名美國、歐洲同澳洲高管嘅調查發現，雖然有 70% 嘅公司積極用緊 AI，但有大約 80% 嘅人都表示，AI 對就業或者生產力「完全無影響」。
睇完高盛嘅分析，似乎 AI 現階段仲係雷聲大雨點小，買晶片嘅錢就畀台韓賺晒，實際打工仔又未覺得好有用。唔知各位網友平時返工或者生活，又覺唔覺得 AI 真係幫到手提升效率呢？
來源: Gizmodo