例如朋友 WhatsApp 你一個電話號碼，以後唔使再長按 Copy 再開電話簿，可以直接加入聯絡人、複製號碼或者打電話；如果訊息入面有日期及時間，就可以直接加入手機日曆，甚至即場在 WhatsApp 建立活動。至於地址就可以直接開地圖，電郵地址亦可以直接用手機的 Email App 開啟或者複製。
日期時間可以直接建立活動
其實部分文字快捷操作以前已經存在，不過今次 WhatsApp 將相關功能進一步整合。當系統識別到可以操作的文字，就會在下面加一條虛線，用戶按一下就會彈出選單，同時顯示 WhatsApp 實際識別到的文字，避免系統認錯內容。版主覺得當中最實用應該係日期及時間。平時約朋友食飯、開會，對方好多時都係直接 WhatsApp 一句「星期五 7 點」，以前可能要自己再開 Calendar 記低，而家就可以直接將日期加入日曆，少一個步驟。
訊息內容唔會傳去 WhatsApp
可能有人會擔心，WhatsApp 要識別訊息內容，係咪代表系統會將對話傳上 Server 分析？WABetaInfo 指，今次文字識別會直接在裝置本身完成，WhatsApp 利用 Regular Expressions 去識別電話號碼、日期、地址及 Email 等格式，過程唔需要將訊息內容或者建議傳送到伺服器，所以亦唔會影響原本的端對端加密。WhatsApp 同時加入回報功能，如果系統識別錯誤，用戶可以回報「有用」或者「冇用」，亦可以指出究竟係識別錯文字，定係根本唔需要出現相關操作。官方收取的只會係回報標記，而唔係訊息內容。
Android、iPhone 都會有
Message Text Actions 目前已經開始向最新版本 WhatsApp 的 Android 及 iOS 用戶推出，不過仍然採用分批開放方式，所以並唔係所有人更新之後都會即時見到。WABetaInfo 表示，未有功能的帳戶會在未來數星期陸續獲得更新，目前 WhatsApp 暫時未公布全面推出日期。呢類功能未必算係甚麼大型更新，但反而係每日真正會用到的改動。尤其平時 WhatsApp 收地址、電話號碼同約時間其實非常普遍，如果之後可以直接一撳開地圖、加入 Calendar 或者打電話，確實方便唔少。來源: Wabetainfo