年卡新選擇！$98 可入手 有 2.8GB csl. 數據 + 無限 Wi-Fi，抵唔抵？

左定坤 (Cho Ting Kwan) 2018-05-05 13:21 | Csl

版主 Keith 成日講到，年卡其實好有市場，討論區好多玩 SIM 的網友，都鍾意玩年卡。然而，對於我個人來說，就對年卡興趣不大了，可能我自己是屬於偏高用量的使用者，總是會覺得年卡用量太少，唔夠我用。但想深一層，其實年卡確係有它的價值，我可以當開張年卡做生意專用 SIM，平時唔係成日用，但偶爾會用來收發 WhatsApp / Messenger，理論上用唔到幾多 Data。好處是：有效時限夠長，攤長慢慢用都得。最近發現有張 csl. 新年卡，入手門檻 $98 即可，又會唔會係低用量的福音呢？睇下文啦！



之前就同大家講過，經過 7-11 便利店，發現到出咗一張全新的旅遊 Club SIM，$88 有 4 日亞太區 (包中國) 漫遊數據，適合網友去短途旅行時用。而 csl. 除咗出咗呢張新 Club SIM 之外，其實仲有另一張專為本地使用的新 SIM ——「7-Connect 本地數據儲值卡」。

仔細看其實佢係一張年卡來的，入手價 $98，在儲值卡包裝上會見到，開卡獎賞會有首 360 日 1GB 本地數據，而下面果行會寫住本地數據組合 (180 日)。不要以為係用完 360 日之後再有 180 日，即係共 1.5 年，朋友你想多了。留意魔鬼細節，原來當你開卡的一瞬間，就會立即啟動 180 日 1.8GB 數據，連同開卡獎賞，即係 $98 實際係俾你用 1 年，共 2.8GB 數據，另外仲可以無限使用 csl. Wi-Fi。

7-Connect 本地數據儲值卡
賣價：$98
網絡商：csl.
使用期限：一年
數據用量：開卡獎賞 (首年 1GB 本地數據) + 本地數據組合 (180 日 1.8GB 數據，每 30 日 300MB)
Wi-Fi 用量：無限


▲ 開卡獎賞首 360 日 1GB 本地數據，然而當你開卡的時候，會同時啟動 180 日 1.8GB 數據 (每 30 日 300MB)，換句話說，$98 你可以用到 1 年，共 2.8GB 數據，另外仲可以無限使用 csl. Wi-Fi。


▲ 卡背會見到表示會有 $40 可使用金額，但要注意的是，每 30 日你係需要繳交 $2.5 牌照費，即一年計 $2.5 x 12 = $30，扣除一年牌照費，其實你只係剩返 $10 可以用，用來打電話都可以嘅。通話收費按時段計，晚上 9 時至早上 11 時 59 分，收費為每 $0.06 / 分鐘，而中午 12 時至晚上 8 時 59 分，收費則為 $0.12 / 分鐘。