網絡商確認香港有 5G 結界!開網 100 萬人無得升級

Keith Yim 2018-06-12 21:04 | Csl
之前有報章爆過料,原來香港 5G 網絡開網會有「結界」有一百萬人享用唔到 5G 網絡。唔係網絡商唔想做,係政府唔俾。呢個 5G  「結界」會令粉嶺﹑大埔﹑沙田﹑馬鞍山﹑赤柱等地的人,不能連接 5G 網絡!有無得攪?可能有,但有排等!版主話你知點解!

ofca-fb.jpg

政府通訊辦早前已發佈了香港 5G 網絡發展時間表,之前版主阿坤都跟大家分享過,根據政府嘅說法,2019 年 4 月左右,香港人就可以享用到 5G 網絡;要大規模覆蓋,就要等到 2020 年。今日版主跟其中一間網絡商代表 csl. (HKT) 的代表傾過,佢地表示,根據政府家陣嘅時間表,2020 年不會有大範圍的 5G 訊號覆蓋,最快都要 2022 年。而更嚴重的問題是 5G  通訊「結界」,呢個政府事前沒公開,但當網絡商知道後,間間都大為吃驚,結果通訊辦都要開工作會議解決。到底發生什麼事呢?

001:3.5GHz 主頻段撞衛星接收站

先講講 5G 通訊「結界」呢個問題。香港 5G 將會由 3.5GHz 及 26GHz,28GHz 頻段提供。但 3.5GHz 5G 跟香港嘅衛星接收發射站有相衝,大埔工業村與赤柱的衛星接收發射站,令到香港出現兩個 5G 通訊「結界」:政府在會影響到衛星發射站訊號的地方,都禁止建立 3.5GHz 5G 網絡,政府策稱作 「3.5GHz 頻帶限制地帶」。影響地點,以大埔工業村附近最大,範圍包括大埔﹑以北的粉嶺,以南的沙田﹑馬鞍山等地;而赤柱的衛星發射站「3.5GHz 頻帶限制地帶」亦包括了赤柱及附近的石澳及南丫島。大家睇下下圖張就知。


zone01.png
▲ 香港有兩個 5G 結界。這個「3.5GHz 頻帶限制區」範圍好大,涉及影響到的人口達一百萬。

002:26GHz / 28GHz 5G 不能入屋

版主上面有講,咁 5G 網絡都可以透過 26GHz / 28GHz 建立!係「結界」裡面行 26GHz / 28GHz 咪得囉。但其實 26GHz / 28GHz 是 mmWave 高頻段,每個發射站只能照顧約 100 米範圍嘅地方,而且穿透力好差,基本上入唔到屋。高頻 5G 其實主要於戶外應用。相反,3.5GHz 做到近似家陣 4G 嘅覆蓋,入室內都用到。所以係「結界」裡面,就算有 5G,跟其他地區的服務 Level 都唔同,室內用唔到。

system_overview.png

▲  26GHz 與 28GHz 都是極高的頻段,需要大量電燈柱做發射站。另外,只能做室外的覆蓋。

003:2G / 3G / 4G 可以變 5G?

香港通訊辦的提議裡面,包括了把現時 2G / 3G / 4G 頻譜重組,變為 5G 網絡,以解決「結界」裡面,無 3.5GHz 5G 嘅問題。不過,csl. 人員亦指出, 5G 嘅上網速度提升,其實跟有幾大頻寬有好大關係。理想嘅 3.5GHz 5G 網絡,網絡商都應該有 100MHz 闊度嘅容量,才能提供跟 4G 速度有顯著分別嘅服務,但現時 2G / 3G / 4G 頻譜,根本無咁闊,就算變為 5G 技術,上網速度上可能跟現時 4G 無大分別,用家得著不多。

IMG_6659.JPG
▲  由 2G / 3G / 4G 頻譜改為 5G,會面臨頻寬唔夠,提供唔到比 4G 網絡更顯著的速度升級。

004:無跟傳媒講,業界反對才處理

5G 「結界」呢個問題,根據版主阿坤憶述,在早前政府通訊辦跟媒體簡佈香港 5G 發佈時,當局隻字不提。後來有報章知道文件裡有提及才發現。據知,業界其實對「結界」範圍過大,都表達不滿,迫得通訊辦都要跟持份者,包括網絡商及衛星公司開會商討如何解決,而 HKT 提出應該在政策層面上,要求衛星公司遷出大埔工業村,令「結界」範圍無咁大。另外,會議亦商討能否在「結界」範圍,批準在商場或港鐵內使用 3.5GHz  5G 服務。但現時只開了一次會,中間還涉及技術測試,5G 通訊「結界」這個問題,最後能否解決到?暫時都未知,亦似乎有相當難度。

IMG_6660.JPG
▲ 版主不明白,正常人都知,有一百萬用唔到 5G 好大問題,當局知道問題,又唔主動業界溝通,要等傳媒發現,業界不滿才安排會議,這樣的政策執行,令版主十分費解。

IMG_6635.JPG
▲ 與此同時,香港電訊 HKT 董事總經理艾維朗指,現時內地透過 5G 建立智能城市步伐較香港快,而近日有報告指出智能城市中,北京、上海及深圳排名均前於香港,若政府再不檢討現時電訊與 5G 政策,香港將成為智慧國家中的「笨城市」(Dumb city)。

最新新聞