比拼 csl.、SmarTone!非 CMHK!呢間網絡商 5G 計劃低至 $97

左定坤 (Cho Ting Kwan) 2021-12-28 15:20 | Csl
其實就算以前 4.5G 服務計劃都係咁,就算計劃幾平都好,都不及多人共享 Plan 抵玩,呢個係不爭嘅事實,但大前提係你要有幾個人一齊 share 月費先得。嚟到 5G,其實結果都係一樣,有幾間網絡商都有多人共享計劃,而最近有間網絡商,仲低至 $97 月費,入門門檻勁低。邊間網絡商,賣個關子先,提示係:唔係 CMHK。同 csl.、SmarTone 比拼,又平幾多呢?睇下文啦!

今次要分享嘅,係中國聯通香港 CUniq HK,推出門市限定 5G 附屬卡優惠,只要選用佢哋嘅 5G 本地數據無憂計劃,就可以用優惠價錢加購附屬卡,第一張卡加 $80,第二張卡加 $60,第三張卡加 $40。所以,如果你加購 3 張附屬卡,即係總共要加 $180,就可以四個人 share 數據。我哋計過,最低門檻係每人月費 $97,平均每人有 12.5GB 數據可以用。不過,我哋講嘅只係最低門檻,每月 12.5GB 就多數唔夠用,而如果去到最高 300GB 用量,加完附屬卡後 4 個人分,平均每人每月 $157 有 75GB,又會唔會抵玩啲呢?

咁你問,對比其他網絡商嘅多人共享 Plan,中國聯通香港係咪叫做好抵玩呢?我就將呢個 Plan 同 csl. 以及 SmarTone 做比較,我就覺得係平嘅。點解無 3HK 同 CMHK 份呢?睇返,3HK 同 CMHK 呢,雖然就有得加附屬卡做共享 Plan,但最多只可以加 2 張附屬卡,條件唔太一致,而為咗盡量公平,就無攞佢哋做比較。而計完之後,csl. 最平個 Plan 都要每人月費 $158,仲要平均每人得 3GB 數據可以用,而 SmarTone 就得一個選擇,平均每人月費 $174 有 27.5GB,相較中國聯通都係無咁抵。

喺畀大家睇計算結果之前,成日都有人混亂,到底中國聯通香港係用緊邊間網絡商提供服務呢?強調一下,以前係 3HK,而家已經唔係,網絡供應商係 csl. 先啱,所以呢點就要大家特別注意一下了!最後奉上比拼結果:

 

最新新聞