網絡商新 Plan！月費低至 $44，有 200Mbps csl. 中港數據 + 送數據漫遊 Day Pass

左定坤 (Cho Ting Kwan) 2022-04-27 18:51 | Csl

如果唔理 4G 定 5G，其實而家手機上網算係好平，百零蚊就有無限上網，就算係 5G，都只係 $149 就有 100GB 用量。而如果 4G，玩儲值卡 SoSIM 都係 $33 / 月，就有 50GB 數據，如果係咁，網絡商啲 so call 平價 Plan，仲有無市場呢？最近有網絡商推出新 Plan，低至 $44 / 月，免行政費兼且送每月數據漫遊 Day Pass，唔知網友又會點睇呢？

中國電信 CTExcel 終於有新攪作

說的是中國電信 CTExcel，其實自 2017 年中國電信係香港推出手機台以來，攪作並唔係好多，亦唔係好多傳媒有報導，一方面可能本身啲計劃唔算特別平，另一方面可能佢哋比較低調，無乜太大攪作。而最近，卻突然間話推出「(中/港) 兩地數據一卡通 高速本地計劃 - 升級版」，申請條件係你係的士佬或者的士佬嘅親友，一共有四個 Plan，月費最平果個係 $48 10GB Plan，速度 200Mbps，其後無限 128Kbps 上網，簽約 24 個月，攜號轉台 / 續約免 2 個月月費，即係計返上嚟月費低至 $44，免行政費，送內地號碼，以及每月有 2 日澳門 / 台灣數據漫遊 Day Pass。

Total 有 4 個 Plan 選擇

至於其他計劃仲包括 20GB、30GB 以及 40GB 無限上網，免咗 2 個月月費之後，平均每月分別為 $89.8、$108.2 以及 $135.7，其中嘅 40GB Plan，就送 3 日澳門 / 台灣數據漫遊 Day Pass。如果你係揸的士，或者有親友係揸的士，唔知你哋又會唔會考慮 Join 呢個 Plan 呢？