csl Lucky SIM 推信用卡優惠！用呢張信用卡買 SIM 享 85 折優惠

左定坤 (Cho Ting Kwan) 2024-04-30 14:47 | Csl

大舖好多時都會同信用卡公司合作，每兩個月推出一次聯乘優惠，將一系列產品減價。然而，唔單止大舖會同信用卡公司合作，估唔到連 SIM 卡公司，都嘗試同銀行推限時優惠！講緊嘅係 csl Lucky SIM，用指定信用卡買 SIM 就可以享有 85 折優惠，呢個着數又係咪適合你呢？



講到 Lucky SIM，佢係一間租用 csl 網絡嘅 MVNO 公司，初初推出嘅時候，成日見佢哋有好多新玩法，好似嗰陣好流行年卡，當時幾乎畀 3HK 萬能卡壟斷市場，然而之後 Lucky SIM 就玩更長嘅有效期，推出年半卡、2 年卡、甚至 3 年卡，畀一次錢基本上可以 3 年無憂，同時佢哋亦有平價養號碼嘅 Plan，啱哂好似版主有好多無限數據 SIM，當時我曾經就 Join 過佢哋養號碼 Plan，無數據，純通話分鐘，$60 就可以一年唔使理佢，啱哂放落雙 SIM 嘅手機度使用。

Lucky SIM 宣佈同中銀合作推限時優惠

最近 Lucky SIM 就宣佈一個突發消息，表示佢哋首次同銀行合作推出限時優惠，而首次合作嘅銀行係中銀香港，由即日起至 5 月 31 日，只要你係中銀信用卡持有人，到 Lucky SIM 網店購買 Lucky SIM，加入購物籃並輸入優惠碼「BOC2024」，就可以享有網上購物 85 折優惠。呢個優惠網友又點睇呢？

另外，Lucky SIM 預告佢哋會有新產品上架，到底會係啲咩呢？到時版主都會密切留意，一有消息就同大家分享一下。