官方確認：指定 3 年 Plan 豁免行政費
之前大家最擔心嘅，就係張卡開咗 $298 嘅 150GB 三年 Plan 之後，每個月仲要額外畀 $3 行政費（License Fee）。三年加埋都要百幾蚊，雖然話可以由得佢扣到負數，到期先算，但總係令人覺得唔舒服。不過，Your Mobile 官方最近終於確認一個重要消息：confirm 客人如申請 $298 / 150GB / 3年 Plan，是可以獲豁免 $3 license fee 了！ 官方仲補充，其實 $198 同 $298 嘅 3 年 Plan 都係全部豁免每月行政費。雖然現時網頁及 App 介面可能要稍等一陣先會 Update 顯示，但系統實際上係已經豁免咗。即係話，大家唔使再擔心個餘額會每個月無端端少咗 $3 啦！
$128 用三年 150GB，真正「零成本」養號？
既然無咗 $3 行政費呢個最大嘅顧慮，我哋再重新審視多次呢張卡嘅價值。深水埗有舖頭做緊清貨價 $128 (據悉最近返咗少量現貨)，買返嚟開卡後，卡內會自動有 $370 儲值額。當你手動輸入「*101*199*15#」然後撥出，開咗個價值 $298 嘅 150GB 三年 Plan 之後，卡入面仲會剩低 $72 餘額。
以前我哋會覺得要預留呢 $72 嚟慢慢扣行政費，但而家官方話唔使扣，即係話呢 $72 餘額係真真正正屬於你嘅！你可以好似之前文章提過咁，用嚟買個中澳台漫遊數據包，又或者留返嚟緊急打電話都得。
平均計返，$128 成本除開 36 個月，每月只需約 $3.55，就有平均每月 4.1GB 數據用，仲要係真正無額外隱藏收費，剩低嘅錢仲可以自己用。對於想 MNP 轉台養個靚號碼，或者買嚟放在 iPad / 副機做後備上網卡嘅朋友嚟講，吸引力真係爆晒燈。
不過都係嗰句，呢批卡始終係「清貨貨尾」，最後開卡日係 2026 年 3 月 31 日，同埋需要自己手動開 Plan，唔係即插即用，比較適合肯自己動手嘅用家。如果你唔介意呢啲小步驟，而家呢個價錢加上免行政費，真係無得輸。數量有限，有興趣就真係要快手啦！