登記速度破過往記錄 完整體驗降低用家上手門檻
談及 HKT.ai 嘅試用反應，林國誠喺訪問中難掩喜色，直言雖然現階段未有披露具體登記數字，但過去幾日嘅數據表現係過往咁多年以嚟「上得最快」嘅一項。香港電訊旗下擁有漫遊、音樂串流、保險同手機保障等多種增值服務，今次 HKT.ai 嘅增長速度全面超越以往嘅各類產品，反映香港市場對實用型 AI 嘅需求遠超預期。
林國誠表示，香港電訊內部早於 2023 年 ChatGPT 興起時已經展開佈局，前線員工對 AI 運作有相當深入嘅認知，亦累積咗豐富嘅實戰經驗，因此正式推出時可以即時為用家提供最適切嘅使用建議。針對坊間已有唔少免費 AI 平台，林國誠認為技術發展越快，市民內心嘅擔憂同疑惑反而越深，好多人可能試用過一兩次，或者只識得用單一功能，未能真正體驗到技術帶嚟嘅便利。HKT.ai 嘅核心服務係提供一個「完整嘅 AI 體驗」，除了整合多款國際同本地頂尖嘅 AI 模型，更由個人業務與商業團隊聯手建立近 100 個專門 Agent，透過具體嘅生活場景引導用家入門，未來亦會因應用家反饋不斷增加 Agent 數量。現階段 HKT.ai 優先開放畀香港電訊旗下服務嘅用家申請，涵蓋 1O1O、CSL、網上行及 Now TV 等客戶，電子數據儲值卡用家亦同樣可以使用，預計未來會逐步擴展至更多本地大眾。
實測淘寶與改功課最受歡迎 一鍵三答支援橫向對比
喺功能應用方面，林國誠引述內部搜集到嘅測試數據，指出有幾項日常功能特別受用家歡迎。排喺前列嘅包括網購輔助嘅「淘寶幫手」以及專門分析升學路向嘅「升學大師」，但最令團隊驚喜嘅係「小朋友改功課」功能獲得極多家庭用家讚賞。林國誠解釋，唔少家長平時為子女購買補充練習同試卷嘅開支唔少，亦要耗費大量時間批改。HKT.ai 嘅改功課功能支援即時影相上載，系統會即刻批改作業並逐項詳細解釋錯誤原因，更能夠識別學校嘅課程進度，即時生成相應嘅練習題以至模擬考試卷，有效減輕家長嘅輔導壓力。