原來，SoSIM 並無舊卡同新卡之分，即係唔會話有大量囤咗好多舊卡嘅情況出現。除非一種情況，就係你喺 SoSIM 初出仲有包裝嗰陣，掃咗好多返嚟，咁嗰啲就可以叫舊卡，用到 2023 年先至實名。而呢種卡，見過旋轉拍賣有炒價到 $50 左右，比起原價 $33 貴 $17，但當時嗰種卡好處係仲有包通宵時段無限上網。
而我都唔記得咗，幾時開始 SoSIM 已經取消咗包裝，直接用一張白色嘅 SIM 卡出售。取消包裝原因好簡單，降低成本，而家你去百佳或者屈臣氏買嘢，你係去拎張 SoSIM 嘅卡，畀職員嘟機，嘟完就會畀張白色 SIM 卡你。而決定需唔需要實名，就係由嘟機嗰刻開始計。亦即係話，如果你 3 月 1 日之前買咗好多 SoSIM，你都一樣可以唔使實名至 2023。但你而家去百佳或者屈臣氏買 SoSIM，就唔使諗一定係要實名。
記得以前 SoSIM 成日搞優惠，例如買十送一之類，唔知網友又會唔會屋企都入咗好多貨，就係等呢一刻拎返出嚟賣呢？如果你係有好多存貨喺度，你又講下你會繼續自用定係賣返出去吧～
