3HK 萬能卡推出全新年卡 Plan！低至 $65 有 24GB 本地數據

左定坤 (Cho Ting Kwan) 2025-05-07 19:59 | 3 香港

好耐無同大家分享過 3HK 萬能卡的消息，記得以前版主成日同大家分享，萬能卡其中一種最受歡迎嘅種類，係年卡，不過自從萬能卡愈來愈受歡迎，開始愈來愈多競爭對手加入戰團，所以之後就有好多年卡選擇，例如 Lucky SIM、鴨聊佳等等。而最近 3HK 萬能卡就更新咗佢哋年卡嘅計劃，低至 $65 就有 24GB 數據。想知詳情，睇下文啦！

3HK 萬能卡推出全新年卡 Plan

3HK 國際萬能卡喺佢哋嘅 Facebook 專頁上宣佈咗一個消息，表示推出咗全新嘅本地年 Plan 數據計劃，其中最平嘅計劃為 $65，包 24GB 本地數據。如果嫌 24GB 本地數據太少，佢另外仲有中用量同高用量嘅計劃，高用量數據包 220GB，價錢係 $328，平均每個月有 18.3GB，網友表示，之前 $328 得 110GB，而家平咗一半！好抵玩。

至於佢哋嘅中用量計劃，價錢則為 $198，有 132GB 本地數據 + 500 本地通話分鐘，平均每個月有 11GB 數據可以用，呢個價錢唔知網友又會唔會考慮呢？