「預繳機價」上台 Plan
說的是 ahaa 網店，呢個網店係由大昌行集團旗下家電零售品牌團隊推出的。玩法係咁嘅，首先你要喺網店度預繳 $588，預繳的 $588 會於第 10 / 12 / 14 / 16 / 18 / 20 期派發，並於賬單上顯示及一併扣除，所以預繳呢筆數，我哋基本可以唔理，因為點都會退返回你。而月費方面，呢個 Plan 月費 $98，簽約 30 個月，包括 30GB 本地 5G 數據，用爆之後唔會停數據，但速度就會限制於最高 1Mbps，一般睇下文字資訊、收發訊息都勉強夠用。另外，佢仲有 4GB 內地及澳門數據，以及 3000 分鐘本地通話。最加分嘅係，呢個 Plan 仲可以免數據任用 13 大串流影片同社交 App，例如 YouTube、Netflix、Disney+、Facebook、WhatsApp 等都包括在內，對於機不離手嘅用家來講非常實際。呢個計劃由 3HK 支援，覆蓋同速度都有基本保證。不過要留意，呢個優惠只適用於開新號碼，或者從 csl、CMHK 等指定台攜號轉台過去，並要喺下單後 30 日內啟用。
部 vivo Y04 手機，係驚喜定「雞肋」？
送嘅手機係 vivo Y04，官方建議零售價為 $798。佢係一部 4G 入門機，最大賣點係 5500mAh 超大容量電池同 IP64 生活防潑水功能，非常耐用。佢有 6.74 吋屏幕、4GB RAM 加 128GB ROM，對於淨係用嚟打電話、玩吓 WhatsApp、睇吓片嘅長輩或者做後備機，都夠用嘅。不過都要提提大家，呢個價位嘅手機有其限制：處理器性能較基礎，相機得 1300 萬像素，而且屏幕解像度同用料都係入門級。如果你係追求打機、影相嘅用家，佢就未必滿足到你。但平平地月費，仲要送埋畀你，仲要求得啲咩先？唯一要挑剔係，上台 5G Plan 但送 4G 手機，呢個有少少奇怪，但當後備，無乜所謂啦！唔知網友又點睇呢？
