主題:香港 5G 實力搶先試!最快上網速度最快會係......

ePrice HK
  • 發表時間:2019-12-17 10:36 收錄檢舉
    仲有大半個月,正式進入 2020 年。2020 年香港會有 5G 流動通訊網絡。事實上,香港政府已在早前完成全部 5G 頻譜指配與拍賣,香港四間網絡商都會係下年第三季左右,推出 5G 服務。咁香港 5G 會點樣發展?開賣初期,最佳上網速度會係點?等版主話你知。

    香港 5G 實力搶先試!最快上網速度最快會係......
     

    香港行乜 5G 頻段

    香港四間網絡商,包括 csl.、數碼通、3 香港及中國移動香港都擁有 5G 頻譜。而香港 5G 網絡,由主要兩組頻譜組成,包括業界叫「黃金頻段」即中頻段,包括 Band 78  的 3.3GHz 及 3.5GHz 及 Band 79嘅  4.9GHz。另外,亦有 mmWave 毫米波頻段,即 Band 258 / 257 嘅 26GHz 及 28GHz。唔知係乜?簡單來講,利用「黃金頻段」嘅 5G,好似家陣 4G 咁,係室外、沒有額外加裝基站嘅室內都收到嘅訊號。而mmWave 毫米波,你當係加強版 WiFi,用係好繁忙嘅地段,令好多人同時使用,都可以用極速上網,但係好似 WiFi 咁,行遠少少都收唔到。

    香港 5G 實力搶先試!最快上網速度最快會係......

    ▲ 香港網絡商擁有嘅頻譜資訊唔係平均嘅。若果,以頻譜數量為王者,csl. 與中國移動香港 CMHK 擁有最多 5G 頻譜。留意嘅係,香港嘅 5G 會以 3.5GHz 作為主頻,3.3GHz 主打室內 (當然,3.5GHz 頻段都可以用係室內嘅)。所以 3.5GHz 頻段多少,都會影響到該網絡商嘅載客能力及最高上網速度。而 4.9GHz 會稍後才能提供服務,主要係器材問題。

    香港 5G 實力搶先試!最快上網速度最快會係......
    ▲ 香港流動通訊 2G / 3G / 4G / 5G 頻譜網絡商資源分佈 (2021  年1月起)。
     

    NSA vs SA 網,要 5G 有用要等多幾年

    咁 5G 網絡又有乜用?唔少科技達人都話 5G 網絡好重要架,無咗 5G,香港嘅智能城市規劃就攪唔掂架啦!係嘅,佢哋無錯。不過,係開台嘅初期 5G 網絡只有一個功能:上網快。由加陣 4G 最高上網速度去到 100Mbps,提升至 500Mbps? 600Mbps?之後呢?無。

    吓,唔係 5G 好重要架咩?原來故事係咁。全球為咗加快架建 5G,所以都先會用 Non Standalone (NSA) ,中文叫「非獨立部署」方式,搶先架建 5G 網絡。不過,NSA 建網,其實是採用咗 4G 嘅系心網絡,再用 5G 嘅頻譜提供服務。呢個方式,減輕網絡商開始 5G 網絡嘅成本,同埋加快推出嘅時間。但因為唔係用上 5G 核心技術,好多專家好推崇嘅 5G 新服務,都做唔到。

    下一個階段,真正有用嘅 5G,會改為 Standalone  (SA) 中文叫「獨立部署」嘅方式完成網絡。改為  SA 架構後,會採用真正 5G 核心網絡,到時先可以再建立真正嘅 5G 服務。要升級至 5G SA 網,應該要等多至少兩年左右。

    香港 5G 實力搶先試!最快上網速度最快會係......
    ▲ 5G NSA 與 5G SA 網絡,在架構上嘅不同。(圖片資料由 CMHK 提供)

    香港 5G 實力搶先試!最快上網速度最快會係......

    ▲ 5G 在處理話音時,亦有所不同。開網時,都要依靠 4G / 3G / 2G 網作通話,稍後會升級支援 5G VoNR,可以在 5G 進行最普通的通話。(圖片資料由 CMHK 提供)
     

    問題來了,乜叫真正嘅 5G 服務,版主舉個好有興趣,好貼身嘅例子:


    Network Slicing  網絡切片:5G SA 網,可以把網絡切割成不同嘅獨立網絡,保證獨立網絡嘅質素,不會受其他用家影響。即係咁,以因應不同行業特性,架設專用網絡,例如海量接入嘅物聯網,低時延應用,如醫院專用網絡作遙距手術等等。

    另一個例子,香港警方可以有佢專用網絡,即係當記者或者突發事件現場,有大量人士上傳片段去傳媒機構,社交網絡等等,也不會影響警方專用網嘅數據通訊。而每個切割出來嘅獨立網,都可以進入網絡核心得到某些認息,例如定位位置。

    而據版主所知,機場管理局有意開設機場專用嘅 5G 網絡。

    香港 5G 實力搶先試!最快上網速度最快會係......

    香港 5G 實力搶先試!最快上網速度最快會係......
    ▲ 5G SA 事實上有不同嘅應用,主要係靠 Netowrk Slicing 特性。(圖片資料由 CMHK 提供)
     

    咁 5G 上網有幾快?睇示範!

    好啦,講到咁深,咁香港 5G 上網速度有幾快?早前,版主係中國移動香港 CMHK 其中一間設有 5G 機站嘅辦公室,睇了一個示範。當時,CMHK 運用了 3.5GHz 嘅 60MHz 頻譜去放出訊號,佢哋利用咗一部華為 5G 手機作 OFCA Speed Test,得到 600Mbps 嘅下載速度。睇番早前 CMHK 嘅示範,好似慢咗 D 喎。睇番之前嘅測試,當時用了 100MHz 嘅頻譜去做,但家陣 CMHK 得到嘅 3.5GHz 頻譜就係得 60MHz 所以 600Mbps 嘅速度,會係香港 5G 係中頻段下嘅最佳速度。大家可以當個參考吧。




     
    多謝支持 ePrice.HK

    立即加入Facebook 專頁,新聞/消息/優惠,最快知。

    01樓 ▲TOP 回列表頁