mySIM 卡化身 5G 推廣卡
家陣好興無合約 Club SIM、Birde、Mo SIM？全部要實名，畀晒身份證資料＋Copy 副本嘅服務，又唔駛簽約嘅手機上台卡，大家可能遺忘咗，CMHK 先至係「先行者」。佢哋張 MySIM，最早出，亦最快摺埋。早排已話唔上客，原來係華麗轉身做 5G 推廣卡。CMHK 嘅 5G 試用卡，其實就係 mySIM 嘅 5G 版。今次 CMHK 其實好厲害，要試用就要你放底個人資料，正常嘅，當上台手續。但要申請呢張試用卡，仲要裝佢哋嘅 myLink App。呢個 App 仲要登記，用手機號碼登記，即係佢又多咗一個方法，問多你一個手機號碼。由於呢個 App 用來控制你個 MySIM 戶口，即係唔 del 得。呢個 App，好貼身架，日日推新聞提要畀你睇，呢排疫情反覆 (經濟日報系網站 tone)，日日都見有疫情消息，真係唔記洗手都被佢推番起。今日推疫情新聞，聽日推啲乜？唔理啦，反正有得試 5G，攞咗先，搶咗 iPhone 12 咪有得插入去玩下囉。登記 + 開箱
係 App 裡面，填晒個人資料，包括姓名、地址、聯絡電話、身份證號碼，上傳埋 ID Card，仲有 Address Proof，就完成登記，佢真係當你上咗台，CMHK 又多一個 5G 客，唔駛求你買 iPhone，唔駛狂 Sell 你用佢哋最平嘅 5G 網絡服務，一切來得 Easy，張卡唔理佢都有 180 日命，你畀少少錢 (十蚊) 續到期，用來谷 5G 客量，呢招高。張卡佢地會用順豐寄去你登記咗嘅送貨地址，等咗幾日，我個順豐 App 提醒我，今日有貨收，再等多幾個鐘，順豐哥哥就送咗張 SIM 嚟啦，OK 開箱。
▲ MyLink App 嘅管理 mySim 介面
咁呢張 MySIM 5G 試用卡包咗乜嘢
001：30 日 5G 試用
002：首 30GB 全速，FUP 後 1Mbps 速度無限上網
003：送 50GB UTV 數據 ＊
004：唔包話音，打唔到電話嘅
005：無得 MNP (帶 Number 轉台）都無得揀 Number
006：無得無限申請，一個 HKID 一張試用卡
007：收卡後，可在三個月內開卡才計算正式使用
＊UTV 係一個視頻 App，大概內容包括有線三個台，新聞財經＋娛樂；TVB 精華；賽馬直播；仲有一堆畀小朋友睇嘅學習類節目
可以 keep 住用
呢張卡，最神奇係 30 日後，可以 keep 住用。張卡有效期係 6 個月，計法以月計，例如開卡係 10 月 17 日，去到11 月 1 日就當用咗一個月。咁 30 日都完咗免費試用，我用到乜？可以買 Package 嘅，根據 MyLink App 顯示，有呢啲嘢玩。$10 包 1日 1GB FUP + 128kbps 無限 5G 數據
$30 包 3日 3GB FUP + 128kbps 無限 5G 數據
$50 包 5日 5GB FUP + 128kbps 無限 5G 數據
$80 包 8日 8GB FUP + 128kbps 無限 5G 數據
$150 包 15 日 15GB FUP + 128kbps 無限 5G 數據
「全部 $10 / 1GB...你問我就唔抵玩囉，百佳 SoSIM $0.6 / 1GB，雖然速度只係 42Mbps 行 4G。」
若果派到個靚 number，我又想 Keep 住佢，可以點 (因為實咗名，嗰 number 使用權係你)？ 每 6 個月買一次服務，因為買一次服務，張卡又會 extend 多 6 個月。
$10 包 30 日 UTV 5GB 數據
$28 包 30 日本地無限通話
或者你仲可以出國，可以買漫遊 Pass，中國 (5G ) 最平 $10 / 日，有 200MB。
可能有 Travel bubble 嘅新加坡都係 $10 一日。
呢張可能係第一張有 5G 漫遊嘅非合約卡，中國、台灣、韓國漫遊都可以連接 5G。
咁買咗可以唔用嘅，又可以 extend 張卡多 60 日。
最後係咪都要送番個 Speed test 俾大家呢？
▲ 呢到收訊只係麻麻，但都有呢個成績 （注意個 speedtest 有問題，顯示不到 5G，但當時肯定收 n78 5G 訊號)