隔離唔怕悶！CMHK、SmarTone 再加碼支援！請你免費聽歌 + 睇戲

左定坤 (Cho Ting Kwan) 2022-01-13 21:30 | 中國移動香港

一個新冠病毒，玩足大家兩年，不斷變種又變種，而家又話 Omicron，香港人想講返啲正常生活，真係要等到 2046。最慘係，而家 Omicron 傳染力咁勁，如果你一個唔好彩中咗，或者只係經過病毒出現嘅地方，咁你都隨時要送去隔離。好在，四大網絡商早前宣佈，隔離會送過百 GB 數據畀你用，至少有得上網無咁悶。而最近 CMHK 同埋 SmarTone 再有加碼支援措施，請你聽歌 + 睇戲，仲有 5G 家居寬頻服務提供！想知詳情，睇下文啦！

CMHK

除咗之前分享過，話 CMHK 會送隔離客戶無限本地數據以及無限本地通話時間，而家 CMHK 仲宣佈會為強制隔離嘅客戶加強支援及關愛，額外提供免費 1 個月 JOOX VIP 音樂服務及 hmvod 標準計劃，客戶只需提供指定相關證明並獲核實後，便可獲豁免 JOOX VIP 音樂服務及 hmvod 標準計劃收費，此特別安排由申請豁免起計1個月。如有需要及查詢，請致電專線2945 8883，將有專人提供協助。

SmarTone

SmarTone 之前就宣佈送 100GB 免費本地數據及無限本地通話分鐘，而 SmarTone 知道喺竹篙灣 WiFi 比較弱，而強制隔離嘅客戶可能有需要連接好多唔同嘅 devices 工作等等，所以除咗100GB Data 同通話分鐘，SmarTone 再為客戶提供 Home 5G 寬頻服務，個路由器會送去竹篙灣，同時都有免費 1 個月 JOOX VIP 同 hmvod 標準計劃送。如有需要及查詢，可透過 WhatsApp 專線 9660 2688 查詢，將有專人提供協助。