CMHK 推中國、香港兩地共用 5G 數據計劃！月費 $179 起，免行政費

左定坤 (Cho Ting Kwan) 2024-05-10 19:14 | 中國移動香港

唔少香港人鍾意北上消費，每次離開香港要諗嘅都係一件事，就係上網點算好。版主自己就比較怕麻煩，所以我好多時都係一張卡做晒所有嘢，我係用 SoSIM，基本上我每年都會續 $138 365 日嘅中國、澳門、台灣 Plan，有 10GB 嘅共用數據，唔夠都仲可以按需要加購數據，亦唔需要好似市面好多 SIM 咁，每日限你用幾多數據。係方便嘅，不過返大陸用中國聯通，未必人人覺得好用。最近中國移動香港 CMHK，就推出咗一咭兩地 5G 數據計劃，月費低至 $179，可以享有中國、香港共用數據，而且仲可以免行政費。想知詳情，睇下文啦！

CMHK 推出中國、香港共用數據 Plan

中國移動香港 CMHK 最近推出咗一個新嘅 5G Plan，叫做「5G 一咭兩地服務計劃」，一聽個名就知道係一張 SIM，可以喺兩個地方使用，邊兩個地方基本上唔需要問，都知係中國同香港。而呢個計劃有三個數據用量選擇，包括 50GB、100GB 同埋 200GB，其後 1Mbps 本地任用，月費分別為 $179、$299 以及 $399，需要簽約 24 個月，攜號轉台仲可以免 $18 行政費。

不過如果你選擇 50GB，就冇送中國內地號碼，如果你想有埋一卡兩號，方便返大陸叫車、叫外賣用，建議就至少上台 100GB 或以上嘅 Plan，因為呢兩個 Plan，會送埋中國內地號碼服務或者「關聯家鄉號」增值服務，並且會包內地通話分鐘。唔知網友又對呢個新計劃有無興趣呢？