香港提早登記無得避！中國移動香港再有兩張副品牌 中國內地漫遊卡都要行新政

左定坤 (Cho Ting Kwan) 2026-06-04 16:53 | 中國移動香港

今次真係火燒連環船，早前我哋分享咗，中國移動香港所有返中國內地嘅漫遊 SIM 卡，都要喺香港（或者非中國內地地區）事前啟動。唔做嘅話，你直接返大陸開卡係用唔到嘅。之前公告涉及中國移動香港同埋佢哋旗下「鴨聊佳」嘅 SIM 卡。今日消息指出，中國移動，係香港仲有兩個副品牌，都要跟今次嘅政策。最奇怪嘅就係，呢兩張副品牌嘅，有關呢個非中國地區開卡，寫得好仔細，點解會係咁，你應該點做？原來太早開卡都冇用，總之麻麻煩煩，一齊嚟了解一下。

中國移動集團中國漫遊 SIM 全受影響

中國移動集團，係香港有兩大公司，包括大家都知嘅中國移動香港 (CMHK) ，同埋專門做漫遊數據生意嘅中國移動國際 (CMLink) ，都係受政策影響，就係漫遊數據，不能在中國內地啟用。點解會係咁，相信網友會知道，總之，兩個品牌，四大 product 都受影響，繼 CMHK 及「鴨聊佳」後，連 CMLink 實體卡 eSIM 及 Banana 實體卡 eSIM 都受影響。CMLink 及 Banana 都係中國移動國際旗下，佢哋解釋比起中國移動香港寫得更清楚。





睇咗兩份公告，今次措施有幾點：
001：是中國內地合規經營
002：僅用於境外來華客戶入境短期使用，不支援中國內地居民購買及使用
003：含中國內地流量的套餐產品將不支援中國內地直接激活啟用 (17/6 起)
004：客戶在中國內地使用 SIM 卡前的 72 小時內，需在中國境外（含港澳台）插卡，並保持手機開機 3-5 分鐘。

法規嘅嘢，都要遵守，但使用上，買咗之後，請不要太早喺香港激活，最早都要到達中國內地前 72 小時進行，冇做就完全用唔到。即係話，買 CMHK、鴨聊佳、CMLink、Banana Travel SIM 無論 eSIM 定實體 SIM 都會受影響，大家北上嘅朋友，要注意了。