真・4G 無限上網儲值卡不再抵玩！「數記」出手加價
講到真・ 4G 無限上網，除左係指唔會有過左某過用量打你落 128kbps 地獄之外，也用到 4G 正速無限上網啦！而能夠滿足到以上要求的，就有版主 Keith 早前都介紹過， Smartone 推出的一張 $48 蚊嘅「寬頻及話音儲值咭」。呢張卡優點一句講晒，就係「最後無限上網樂土」。其儲值卡上網 FUP （Fair Usage Policy) 政策沒有跟隨 csl 或者 3HK 的做法，即超過指定用量限速，只會調整網絡使用優先次序。價錢方面，「寬頻及話音儲值咭」本身要 $48 蚊，當然唔算平。但係深水埗價錢因為只係廿幾蚊，而且係買入 SIM 卡後，又會即送 $8 ，變相面值有 $48+8 ，即使一開卡即扣 $2.5 ，仍然可以在一日無限上網收費 $24 的情況下，用到兩日真・無限上網。再計返係深水埗入手的價錢的話，即係廿幾三十蚊用到兩日無限上網，都叫抵玩的。
但隨住 Smartone 出「辣招」，以上呢支歌仔就無得唱了。如果大家有留意的話， Smartone 在官方網站上已改了資料。「寬頻及話音儲值咭」變成「 $48 增強版 寬頻及話音儲值咭」。更重要係，在「數據日費組合」上面，一日收費改成了 $30 ！問題就來了，當一日無限上網收費要 $30 ，亦即係一張卡並不能換到兩日無限上網！即使呢款 SIM 卡在深水埗賣價不變，但係由「廿幾三十蚊用到兩日無限上網」變成「廿幾三十蚊用到一日無限上網」，大家的開支是多了一倍啊！
▲想襯 Smartone 加價前買返幾張「寬頻及話音儲值咭」的朋友不用擔心，而家係深水埗仲大把貨，價錢都係 $28-$30 左右。
趕絕無限上網早有預兆，Smartone 數據 Plan 內容一步步改變
上文提到 Smartone 「出辣招」，除左將儲值卡大幅加價之外，其實仲有另一著，而且係一步步慢慢實行，未必人人留意到。如果閣下係 Smartone 用戶的話，可能都知道， Smartone 針對平板以及 modems （WiFi 蛋）而推出的數據 Plan ，而家已經無左「每月加 HK$148 升級至 FUP 無限數據」呢個服務，變成了「每月加 HK$148 可享 10GB 附加本地數據」。另外，目前 Smartone針對手機而推出的 10GB 或者 6GB 數據 Plan ，雖然仲可以升級至 FUP 無限數據。但係價錢上早前已經加左一次，由 $138 加至 $148 。所以「數記」有意一步步取消無限上網，其實有跡可尋的。還有一點可以見到 Smartone 正準備取消無限上網。其實有唔少 Smartone 用家，係無限數據 Plan 完結前，透過「唔續約，又唔簽新約」的方式，一直可以繼續用無限上網嘅。不過，有用家向版主提到，近來 Smartone 已經著手「處理」呢批用家，唔會再提供無限上網服務。
▲ 從Smartone 官網可以見到，針對平板以及其他流動裝置推出的數據 Plan ，已經無左 FUP 無限數據了。
有沒有另外的選擇？ Vave 未必咁抵用呢
係儲值卡又加價，上台 Plan 又唔平的情況下，需要真・4G 無限上網的用家又有乜選擇呢？另一個比到無限上網的 SIM 卡，仲有版主 Keith 一樣有介紹過的 Vave 儲值卡，而家係深水埗都係賣緊 $200 左右。不過，對於真正高用量用家而言，呢張卡都仲係有點伏，因為版主 Keith 實試過，當用量過左 30GB 後就會限速，同時係網絡多人用的情況下速度也會變慢。簡而言之，今次 Smartone 加價，對於高用量用家而言，會很頭痕呢！
▲Vave 30 日 4G 無限上網儲值卡有兩種，價錢而家係深水埗相差不過 $10 。