主題:抵過自由鳥!數碼通暗推新計劃!$68 無限上網 + 有話音及 VAS 可 MNP

ePrice HK
  • 發表時間:2020-05-05 12:44 收錄檢舉
    踏入 5G 年代,理論上現有 4G 計劃應該會更平。而呢個時候自由鳥就推出新 Plan,價錢就無減反增,不過速度就稍為提速至 42Mbps,詳情可以按這裡睇下新 Plan 介紹。覺得自由鳥唔夠抵?其實數碼通自己都有暗推新計劃,只需要 $68 就有無限上網,包哂話音同 VAS 服務,而且仲可以攜號轉台𠻹!想知詳情,睇下文啦!

    數碼通暗推新計劃!$68 無限上網 + 有話音及 VAS 可 MNP
     

    數碼通暗推 $68 預繳式月費計劃

    數碼通的「寬頻及話音儲值卡」日前暗推一個預繳式嘅月費計劃,月費只需 $68,就可以享有 2GB 嘅 21Mbps 數據,而用完 2GB 之後並唔會跌到落 128kbps 地獄速,而會係可以繼續以不高於 1Mbps 嘅速度無限上網,對比起 128kbps 地獄速嚟講,1Mbps 速度做到嘅嘢多好多,只要你唔係要求要打機,主要普通上下網,覆下 WhatsApp,1Mbps 雖然唔快,但至少用到,YouTube 睇 360p 影片,理論上都無大問題。

    而呢張儲值卡除咗有得上網,內裡配套亦相當齊全,包哂話音同埋成套 VAS 服務,包括:

    - 2000 本地通話分鐘
    - 通話管理服務組合:留言信箱、來電轉駁、基本來電管家及系統短訊轉發服務

    數碼通暗推新計劃!$68 無限上網 + 有話音及 VAS 可 MNP
     

    用完一個月之後,想續 Plan 可以點做?

    簡單,買增值券就得。邊度有得買?

    1. SmarTone 門市、SmarTone 網上商店、SmarTone銷售隊同全港超過900多個掛有SmarTone標誌嘅特約經銷商

    2. 7-11 / OK 便利店

    3. 旺角東站 / 九龍塘站 (閘內) - 自動販賣機

    雖然官網係咁寫:「於推廣期內,當以上月費計劃生效時,每月HK$3之行政費將會豁免」,但佢無講到推廣期內係去到幾時,而版主問過 Hotline 職員,就表示 $68 已經包埋行政費,所以就算續 Plan,只要儲值卡內有 $68 儲值額就 ok。
     

    有無得 MNP?如有,有咩要準備?

    呢張「寬頻及話音儲值卡」有無得 MNP 呢?版主打電話去客戶服務熱線問過,係有嘅。只要預返三個工作天去到任何一間數碼通門市,同職員講我想帶 Number 轉去 $68 果個寬頻及話音儲值卡,填張 form,畀齊所需嘅資料佢,佢就會畀張新卡你,好簡單同你處理轉台嘅問題。

    而「所需資料」係啲乜?基本上同其他儲值卡搞 MNP 嘅相同。

    上台客戶:如果你本身係上台客戶,就要帶同你嘅身份證明文件。
    儲值卡客戶:你要帶埋你用緊果張儲值卡去,畀職員記錄返你嘅 iccid 號碼。


    當然,如果儲值卡客戶的話,你張儲值卡要仲 activate 緊,入面要仲有餘額先至可以做到轉台吧!

    最後,呢個數碼通 $68 預繳式月費計劃,好似比起自由鳥新 Plan 仲要抵玩,唔知網友又點睇呢?留言討論下啦!

    立即加入Facebook 專頁,新聞/消息/優惠,最快知。

    01樓 ▲TOP 回列表頁