每月65蚊有5G無限上網! SmarTone 儲值卡新plan抵唔抵?

ManHungTech | 數碼通
Smartone 5G prepaid.jpg

話說 Smartone 之前低調為旗下$68儲值卡推出 5G 試用月費組合,每個月只需$48就可以享用5GB 全速 5G 數據,或者$88 10GB,方便有意轉用 Smartone 5G 正式月費計畫、5G CPE 家居寬頻的消費者事先測試 Smartone 5G 網絡的覆蓋及網速。

Man 早前亦抱著好奇心態買一張 (SSP $30有交易),然後增值$50,親自開一個$88 10GB 組合,走遍港九新界測試 Smartone 5G 網絡,詳細測速報告可按此閱讀。

最近發現 Smartone 已經將上述$68儲值卡下架,由全新$65月用輕量王儲值卡取代,個名改得如何就見仁見智。無意中發現此儲值卡預設一個$65月費計畫,每三十日自動扣錢,月費包含無限數據、2000本地通話分鐘,仔細留意官網條款,就會見到「此 咭 支 援 本 地 5G / 4G / 3G 數 據 服 務」。原來$65就有 5G 無限上網,的確難得一見。

當然,目前最平 5G 上台 plan 都要過百元,要簽兩年約,儲值卡點可能有特別優惠呢? 無錯,此$65月費組合有速度限制,首 5GB 的最高速度為 21Mbps,過 5GB 後就 1Mbps 無限上網,所以並非真正全速 5G 上網,與上次 $48 5GB 計畫完全不同,購買之前一定要留意。

簡言之,5G 網絡只是表面包裝,因為最高速度鎖實 21Mbps (除非暗中格外開恩),其實不少 4G 儲值卡更平,速度隨時超過 21Mbps。如果上台前想測試覆蓋和訊號質素,$65的確划算,但不適合測試 Smartone 5G 速度表現,限速情況下的測速成績絕不能夠反映上台計畫的真正表現。
 

廣告