大鋪即減戰「升級」! HTC、 Sony 、 LG 、三星回收價齊齊跌!

Eddie | 網絡消息
「早買早享受,遲買平幾舊」真係日日都發生,上星期之講完衛訊由「送贈券」升級到「即減」,今日 ( 8 月 5 號)百老匯又跟住做即減,可惜豐澤就已經退場唔玩連贈券都唔派,呢場減價戰其實都幾精彩。不過係減價大家買到平機既同時,細鋪同埋場內都影響幾大,最慘就係回收價比起上星期再跌幾百, HTC、 Sony 、 LG 、 Samsung 無一倖免。咁搞法,會唔會影響大家等新機既意欲呢?

//timgm.eprice.com.hk/hk/mobile/img/2014-08/05/178495/unrealandy_1_4247_b3ff7bf1814f04fff16bd67e14bf1d48.jpg
 

百老匯跟住做即減 $1,200!要留意計「單一貨品價」

老老實實,大鋪即減優惠版主已經講過不下三次,我諗睇開 ePrice 既網友應該好熟了吧。今日百老匯突然將「送贈券」優惠轉做「買滿即減」,同衛訊一樣都係差唔多八折既優惠,不過條款亦略有不同。首先呢個優惠係唔可以分期付款,亦唔可以同時做信用卡優惠;其次佢係計「單一貨品價」,例如買 LG G3 (32GB) 就最多只可以減 $1,000 ,即使連配件買都唔會有 「買 $6,000 減 $1,200」優惠,最後當然就係 Apple 產品(iPhone) 冇得即減啦。

同衛訊相比,其實兩個優惠好接近,就 LG G3(32GB) 為例,兩邊都係送保護貼與原裝電池,然而衛訊如果買埋保護套可以減 $1,200 計落去划算少少。當然呢個優惠係唔知做到幾時,店員永遠都係果句:有買趁手。究竟係市場太淡定係趕住係新機出之前清貨呢?(或者兩者皆對icon

//timgm.eprice.com.hk/hk/mobile/img/2014-08/05/178495/unrealandy_3_4247_224ce6c3a5588a9c9c0d8f59b85b64fe.jpg
▲今日下午剛剛改了優惠,版主今朝睇都仲係「送贈券」,呢場減價戰愈演愈激烈。
 

先達回收價小跌!店員:「收機冇肉食」!

大鋪減價,最大影響應該就係先達同埋場內細鋪,畢竟價錢差唔多時侯,網友都會比較信大鋪的保養吧。版主留意到 HTC One (M8) 、 Sony Xperia Z2 、 Samsung Galaxy S5 同埋 LG G3 既場內回收價都比起之前跌左 $500 ~$600 ,呢幾部旗艦手機回收價平均都只係 $3,300 ~ $4,000 徘徊,不過場內跟單的「全新行貨」就冇咩點跌價。有問過場內鋪頭佢地點睇大鋪減價,佢地都直接話生意難做,佢地話其實而家收機真係「冇肉食」,仲話如果用超過大鋪即減價去回收,佢地不如直接去衛訊入貨賺信用卡積分(不過點散貨先icon)。

經常行場既版主 Eddie 都覺得一些賣平機、大陸性價比手機的鋪比之前靜了不少,或多或少都因為大鋪直減所影響吧。傳聞 9 月 3 號就會有 Samsung Galaxy Note 4, Sony 亦會在同一日舉行發佈會,而萬眾期待既新 iPhone 亦都傳聞快到,網友仲係咪「按兵不動」呢?留言講講睇法吧!

//timgm.eprice.com.hk/hk/mobile/img/2014-08/05/178495/unrealandy_3_4247_2b2aaa50a6439ff535f8cf4c815e841f.jpg
▲現在場內的回收價比起之前低上不少,不過大鋪的回收價好似冇咩點變, Trade-in 的話還是大鋪比較划算哩icon
 
廣告