主題:型格 vs 性價比! 日韓水貨 你揀米老鼠定 L24 ?

ePrice HK
  • 發表時間:2015-01-08 20:14
    香港人買水貨手機多數呢三個地區:中國大陸、日本及南韓。前者貪佢有中港 4G,之後兩個北亞國家來貨,唔係貪佢有特別版,就係買佢平過行貨相類型號!  今次版主就揀左幾部日韓水機,有啲性價比出色,亦有靠外型「殺晒」,唔知大家又會揀邊部呢?

    型格 vs 性價比! 日韓水貨 你揀米老鼠定 L24 ?
     

    型格之選 (1) :規芒+高規 Sharp AQUA Xx 304sh

    當提到並無係香港推出行貨的日本手機牌子相信大家都會諗起 Sharp。Sharp 係香港曾經紅過,尤其數碼通把日本版改為港版,令大家嘗試到手機芒,係可以好靚,仲可以靚得好誇張。最近水貨新作,大家會記起 Sharp AQUOS CRYSTAL SH305,尤其佢個近乎無邊的屏幕。不過,有留意規格,SH305 只係 720p 解像度再加 Qualcomm S400 處理器! 版主反而為大家推介 Sharp 304sh ,外型一樣咁潮,規格強好多。外型上 Sharp 304sh 真係幾掂,有三邊超窄屏幕邊框,高達 78% 屏佔比,加埋用上日系風格的設計,相信都幾難搵到有港行機可以係外型上同 304sh 匹敵。而規格上 304sh 同樣唔失禮,有5.2 吋 FHD 屏幕,處理器上亦有 Qualcomm S801 2.3GHz 四核, 2GB RAM 同埋 32GB ROM (可插卡,最大 128GB ),相機上都有 1310 萬像素主鏡頭,以及 2600mAh 電池。

    賣價:約 $3480

    型格 vs 性價比! 日韓水貨 你揀米老鼠定 L24 ?
    ▲  Sharp 304sh 是日本本土手機,傳統日系機嘅感覺更加重啦。
     

    型格之選 (2) :米老鼠加持  Sharp SH-02G

    坦白講,選購日韓水機有時可能性價比因素反而唔夠本身手機的噱頭重要,呢部迪士尼手機 SH-02G 就係其中一個例子,簡單來講佢只係一部粉藍色特別版的 SH-01G ,但加左迪士尼元素係手機到就成件事唔同晒!同 SH-01G 相比呢部迪士尼手機除左機跟機多一個有米奇圖案的耳機塞之外,主要分別就預載左迪士尼主題同埋手機鈴聲。而係硬件規格上呢部迪士尼手機 SH-02G 用左 5.5 吋 FHD 屏幕,Qualcomm S801 2.3GHz 四核、 2GB RAM 同 32GB ROM , 1310 萬像素相機同埋 3300mAh 電池。

    賣價:約 $6580

    型格 vs 性價比! 日韓水貨 你揀米老鼠定 L24 ?
    ▲  作為迪士尼特別版, SH-02G 會送多個耳機塞。
     

    型格之選 (3) :韓水 LG AKA

    LG 韓水與日水手機,分分鐘出名過香港行貨。無他,價錢平到爆!好似 LG G3 的日本水貨 L24 同版主今次推介的 LG AKA 賣價差唔多,但講到得意與可愛,LG AKA 正好多! AKA 係 LG 自家創作卡通人物,名字為 Soul、Wookie、Eggy 和 YoYo,最好玩係手機加入一個特別版的保護套後,突出來的屏幕部份,會變為一對好鬼的眼晴!手機本身規格好普通:用上 5 吋 720p 屏幕,處理器方面就採用Qualcomm S400 1.2GHz 四核心,配合1.5GB RAM 同埋 16GB內存,相機方面 前後鏡頭分別係 210 萬和 800 萬像素。LG AKA 賣價貴過 L24 架!但都係唔過三千蚊,買俾女仔,會幾唔錯。

    賣價:約 $2880。

    型格 vs 性價比! 日韓水貨 你揀米老鼠定 L24 ?
    ▲ LG AKA 一共有四款顏色的機蓋,每款襯返 4 個唔同的卡通人物。

    型格 vs 性價比! 日韓水貨 你揀米老鼠定 L24 ?
    ▲ 加左機蓋 LG AKA 會變成咁樣,係咪好過癮呢? 
     

    性價比日韓水報價 (1) : LG G3 日水 LG L24

    講到日水之中的性價比之王,目前來講就真係非唔少網友都提過的 LG L24 莫屬。呢部日本水貨版 LG G3 除左係外觀上同港行唔同(版主就覺得藍色日水版比港行外型靚仔好多),仲有埋防水防塵。規格上基本同港行一樣,同樣係  Qualcomm S801 2.5Ghz 四核心 CPU ,配合 2GB RAM,而日版就有 32GB ROM,以及一樣有 laser auto focus 千三萬像素相機。值得留意係,日水機一向有個問題就係支援頻段會比港行手機少,好似 L24 就只有 FDD-LTE 1800 頻段,3G WCDMA 亦只有 2100 頻段,所以係網絡接收上相比一般港行港行手機可能會差少少(特別係旺區),同時係網上都有人反映當日水手機網絡跌至 3G 時,往往未能夠自動搵返 4G 頻段,入手時可能要留意了。

    價價:約 $2230 

    型格 vs 性價比! 日韓水貨 你揀米老鼠定 L24 ?
    ▲ 防水防塵兼規格強勁而且唔洗兩千五,難怪 L24 咁受歡迎。 
     

    性價比日韓水報價 (1) : Vega A910

    雖然係 2014 年出左亦都有提過,但同樣係香港並無正式推出而外型又出眾的手機其實韓水 Vega A910 都係一個相當唔錯的選擇。Vega 即係 Pantech 香港絕對無行貨。而呢款 A910 就有 5.3 吋 FHD   屏幕、用上 Qualcomm S801 2.3GHz 四核心處理器同內置 32GB 容量,3GB RAM。相機方面有 1300 萬像素鏡頭,電池容量有成 3220 mAh。

    價價:約 $2680

    型格 vs 性價比! 日韓水貨 你揀米老鼠定 L24 ?
    ▲  雖然上年已經提過,但呢部 A910 最近仍然非常受歡迎。

    版主一口氣介紹韓、日兩地賣外型的手機;也有性價比好高的日、韓水貨。ePrice 網友,你又點揀?齊齊投票及發表現見吧。
     

    鳴謝及查詢:三禾電氣 23740618 (旺角) 23740718 (銅鑼灣)

    立即加入Facebook 專頁,新聞/消息/優惠,最快知。

    01樓 ▲TOP 回列表頁