$1,500 得 50MB 上網!遊北韓買激罕高麗電訊 SIM 卡
|
網絡消息
Facebook 專頁「又飛啦! Flyagain.la」的網主日前分享佢早前去北韓嘅遊記,當中提到佢購買高麗電訊 SIM 卡的經驗。高麗電訊係北韓唯一電訊商,喺 6 大城市提供互聯網服務,專門俾外國人使用嘅 Koryolink SIM 卡,以往主要為喺北韓經商嘅人而設,隨著金正恩上場後北韓開始發展旅遊業賺外匯,SIM 卡亦會賣俾遊客。根據「又飛啦! Flyagain.la」網主的經驗,平壤機場抵埗大堂有得賣,但如果想喺市中心入手,就要睇下導遊肯唔肯安排。
▲ 要喺平壤機場買定 SIM 卡,否則去到市區就要靠導遊安排。
不過呢張 Koryolink SIM 卡絕對唔平,「又飛啦! Flyagain.la」網主表示開卡費用高達 200 美元(折合 HK$1,570),而且只包 50MB 流動數據同約 7 分鐘致電香港嘅通話時間,如果放棄語音通話則可以獲 70MB 額外流動數據,合共有 120MB。「又飛啦! Flyagain.la」網主作過簡單測試,發現包括搜尋和 Gmail 等 Google 服務、Hotmail、Yahoo、WhatsApp、WeChat,連同蘋果日報在內的香港媒體,都可以用 Koryolink SIM 卡連接到,不過 Facebook、Instagram、YouTube、Twitter 就要用 VPN,即係翻牆先可以用到,打卡發帖都冇問題。
▲ 平時開完 SIM,將膠卡好多時都會丟棄,但呢張高麗電訊 SIM,用來當旅行紀念品就最啱,話晒成千二蚊!
「又飛啦! Flyagain.la」網主有經驗分享,佢話 120MB 流動數據要慳住用,當有需要先開啟 Data 功能,接收完 Email、WhatsApp 就要馬上關閉,在離線環境下睇同回覆,之後再開啟 Data 功能傳送。手機亦要將無用的提示功能關閉,有團友試過用呢招可以頂到 3 日,而網主則因為忘記夜晚關 Data 功能,一晚 120MB 數據就被自動同步功能用完。開卡後的額外數據係每 1MB 0.2 美元(約 HK$1.6),不過增值要導遊幫手安排,網主就同導遊傾咗 5 日先充到值,所以諗住不計成本喺北韓開 Live,都要搞掂增值同翻牆,何況喺北韓亂咁影隨時出事,都係專心做遊客比較好。
▲ 睇到蘋果日報唔出奇,螢幕左上角個台號寫住 Koryolink 真係值得 Cap 圖留念。
資料來源:又飛啦! Flyagain.la