版主和你猜!預測下政府 $5000 電子消費券 點樣先用到
|
網絡消息
嗱,話明「和你猜」,就真係只係估估下,就係香港呢個電子消費券模式,會唔會其實效法緊澳門。不過,同澳門唔同嘅係,澳門就無八達通,所以政府就改為派發張電子消費卡,等啲人消費時使用,自動喺卡入面扣賬,而香港個玩法就估計係,要大家喺八達通、PayMe 等電子支付平台實名,因為你實名咗,從而先可以確認你係咪 18 歲以上人士,從而亦都可以記錄大眾嘅消費模式,以及去過邊度消費。
但係,逼你用呢啲電子支付工具消費,未必真係會如預期方便,原因如下:
1) 好多時好似老人家果啲咁,根本唔識得點用電子支付,咁政府派咗 $1000 畀佢哋,可能根本就用唔到。
2) 限制咗指定商戶。因為電子支付,商戶就要有該電子支付平台嘅終端機,例如八達通、AliPay 等等,咁好似如果你想用呢 $5000 買電子產品,去到一啲大舖未必有得嘟八達通,咁一樣用唔到入面嘅錢,變咗有個限制喺度。另外,如果有啲朋友諗住去一啲良心店舖消費,又用唔用得到呢?
3) 限制用途。同派錢唔同嘅係,如果政府派錢畀你,你係有得選擇用定唔用,唔用就擺喺銀行儲住佢,真係到有需要先嚟用,但而家電子消費券個模式係,連續五個月畀 $1000 你,你一定要果個月用咗佢,當然你都可以選擇用定唔用,但你唔用就你蝕咗囉。