根據豐澤網店顯示，Ulefone Note 6P 建議零售價為 $699，作為後備機尚算可以，作為安心機就貴咗少少，但叫做又多一部幾百蚊貨仔嘅手機選擇，有力同 Nokia 啲安心機分一杯羹，話哂之前 Nokia 都講安心機好好賣，咁 Ulefone Note 6P 呢個時候推出，都應該可以食到個勢嘅。
而 Ulefone Note 6P 採用咗 6.1 吋芒，解像度為 1560 x 720，配備紫光展銳 Unisoc SC9863A 八核心處理器，內置 2GB RAM 以及 32GB ROM，支持最高 128GB microSD 擴充，電池容量為 3300mAh。相機部分具有 8MP 主鏡頭，而前置鏡頭則為 5MP。另外，手機支持真三卡，即係可以同時用到兩張 SIM 卡以及一張 microSD 卡，並且手機會運行 Android 11 Go 作業系統。
除咗平同埋真三卡，我實在諗唔到呢部 Ulefone 手機，有乜嘢突出嘅賣點，畢竟喺我印象中嘅 Ulefone，好鍾意推出啲三防機，又有大大舊電，用 MTK Helio P 系列嘅 U，今次呢部 Note 6P 所用嘅紫光展銳 U，又好似唔係好知佢咩料咁，不過網上 check 返跑分都有 12 萬分嘅，電又唔算大，但作為後備機安心機，都仲可以接受。你又點睇呢？
