電訊公司一年公佈兩次成績
香港手機台競爭劇烈大家都知。而四間網絡商當中，有三間本地手機台服務係佢哋母公司嘅 Core Business，喺佢地母公司上市業績報告，就要交待佢哋嘅營運情況，一年兩次！3 香港母公司和記電訊香港控股、csl /1O1O 及 Sun Mobile 母公司香港電訊，會喺每年二月份公佈全年業績、七月份公佈上半年業績；而數碼通會喺二月份公佈下半年業績、七月份公佈全年業績。所以我哋可以每年兩次睇下佢哋每半年嘅營運成績。至於中國移動香港呢？因為佢哋母公司係全國性嘅中國移動，雖然佢係香港 H 股，但業績報告好少提及香港分公司，所以有關中國移動香港營運資料，真係得佢講，例如佢哋早喺 2021 年 6 月已有五百萬香港用戶，你只要信，不要問，佢哋話五百萬，咪五百萬囉。Fact 001：邊間網絡商最多客戶
或者你會問，一間網絡商客戶有幾多，對我有乜影響？客戶太多，若果網絡設備不足夠 (地方不足起唔到咁多基站），Jam 爆基站，上網難咗一啲都唔出奇。四間網絡商，中國移動香港早在 2021 年 6 月已稱自己有五百萬客戶 (上台加儲值卡客戶)，當然一如上面咁講，佢講你就信啦。但無得假嘅業績報告話你知，csl 喺 2022 年 12 月 31 日，有 470 萬客戶，而全港最少客戶係數碼通，只有 260 萬客戶，而 3 香港客戶總人數同期為 330 萬，注意嘅係，呢個數已包括咗月費及儲值卡客戶。不過，我再睇真份業績，和記電訊有寫明，3 香港客戶月費客戶佔總數一半都無，月費客戶與儲值卡如 SoSIM、萬能卡等，佔客戶人數比只有 45:55。簡單嚟講，真係月月肯俾月費嘅客戶只有 147 萬。HKT 系包括 csl. 1O1O 及 SunMobile 都有分開預付客與月費客計算，月費客戶與預付客戶人數比例係 7:3 開，所以若果只計月費人數，HKT 系月費客戶人數都比 SmarTone、３香港多，達 333 萬客戶。數碼通無分開月費客戶與儲值卡客數目，但估計跟 HKT 系差不多，假設月費客戶與儲值卡客戶人數比例係 7:3 開，SmarTone 的月費客戶人數估計都有 182 萬。SmarTone 月費客戶人數，有可能多過 3 香港。
Fact 002：邊間網絡商平均月費最貴
月費有平有貴，過千元至一百蚊有找都有。但電訊業界有一個概念叫 「ARPU」即：Average Revenue per User，中文即是「每名月費客戶平均收入」到底你用緊嘅月費同增值服務，係嗰間網絡商嘅平均以上，定係平均以下呢？中國移動香港沒有本地業績，佢哋嘅 ARPU 得佢地知。HKT 有 1O1O，收緊最貴月費，但都有 Sun Mobile 用嚟吸大眾客，一貴一平，原來佢地嘅 ARPU 只有 $188。而 ARPU 最高嘅，一直都係 SmarTone，多年不變，2022 年為 $233，3HK 繼續全港最低 ARPU，只有 $163 蚊。
▲ 資料來自香港上市公司 香港電訊 (6823) 及數碼通 (0315) 2022 全年業績、和記電訊香港控股 (215) 2022-23 中期業績，再計算出嚟，數字截止 2022 年 12月底。＃截止 2023 年 2月底。* 根據 CMHK 於 2021年6月及 2022年11月的新聞稿公佈。3 香港及數碼通的用戶人數，是包括咗香港及澳門的客戶人數。
Fact 003：5G 受歡迎嗎
香港嘅 5G 網絡，在 2020 年 4月 1 日開通，去到 2022 年底，根據三大網絡商，原來大家都有三成嘅客戶，已用上 5G 網絡。花了約三年時間，只有三成客戶升級，人數算多嗎？版主喺 OFCA 香港電訊通訊管理辦公室資料睇返，當年 3G 升級 4G，由第六年開始，4G 客戶人數才正式超越 3G 用戶。所以部份 5G 網絡商用了約三年時間，有 30% 客戶已升級，成績叫不過不失。
▲ 根據香港官方通訊事務管理局統計數字，香港手機用戶數字在 2021 年 12 月達頂峰後，開始下跌。儲值卡用戶在 2019 年高峰後，因為 COVID19 限制外遊及遊客到港，加上儲值卡實名制，用戶亦急跌，近來已止跌回升。
▲ 根據香港官方通訊事務管理局統計數字，香港在 2022 年 2 月由高峰有 2190 萬 4G 用戶，之後開始下跌，至 2022 年 11 月的 1710 萬，而 5G 用戶由同期的 300 萬升至 440 萬。5G 用戶越來越多，但 4G 及 5G 用戶數字差距，依然好大。
▲ 根據香港官方通訊事務管理局統計數字，香港喺 2012 年正式推出 4G 服務。2013 年通訊事務管理局才正式分拆 3G 及 4G 用戶數目。而資料顯示，在 2017 年 4G 用戶上升最多一年，年底用戶數字正式超過 3G 用戶數目，由正式啟動 4G 至超越 3G 用戶數量，共花了約 6 年時間。根據以往走勢，香港在 2020 年 4 月推出 5G 服務，相信要在 2026 年左右，5G 才會成為真正主流。
Fact 004：5G 乜嘢應用最了得
就快三年了，大家對 5G 印象係乜嘢？有令到大家轉用嘅動機又係乜？其實，三份業績都講咗俾大家知，5G 網絡最吸引用家，唔係乜嘢 metaverse，乜嘢智慧城市，而係 5G 寬頻。雖然話香港好多地方都有光纖覆蓋，不少人家中已可以享受高速達 2GBps 上網服務，但都唔少人好似版主咁，住喺鄉郊，因地主問題，光纖不達。5G 寬頻服務，配上一個先進的 5G 連 WiFI Router，上網速度都唔差，以版主用咗兩年為例，由以前不到 100Mbps 速度，到今日已去到超越 200Mbps。加上 5G Router 連帶 WiFi 放送訊號能力都強，近期款式更支援 Mesh WiFi，5G 寬頻成為無光纖覆蓋用家福音。另外，更加估唔到有不少就算有光纖到戶嘅用家，唔想攪裝修舖線，或者想用私家「線」，三間網絡商都大示推廣，根據業績報告，上客升幅好勁！
▲ 和記電訊香港在2022年業續報告，有幾大篇幅講述 5G 寬頻服務增長情況。
▲ 數碼通在2022-23年中期業續報告，亦有講之 5G 寬頻有強勁增長。
Fact 005：csl 及 3HK 披露 5G 舖網新進展
網絡商母公司的業績報告，會披露了未大示宣揚嘅網絡發展，例如幾年前當 5G 未開通時，SmarTone 喺佢地業績報告，靜靜雞咁放咗張 5G 覆蓋圖，令大家知道 5G 初期會覆蓋到乜嘢地方。今次呢？我哋係和記電訊香港業績報告中，見到佢地將用於 4G LTE 的 2300MHz (Band40) 頻段，變為 5G (n40)，而根據住喺大埔的朋友告知，n40 5G 訊號，已在該區啟動，相信是用嚟補求 3 香港因為沒有投標 n79 頻段（補足大埔、馬鞍山、粉嶺、科學園一帶沒有 n78 主要 5G 頻段）的問題，而其他地方，2300MHz 會繼續服務 4G 用戶）
▲ 當然，3 香港都會強調啟動了 700MHz (5G) 的工程，加強鄉郊訊號，而報告把 2300MHz 寫入 5G 頻段，即是上文講的 4G Band 40 變為 5G n40 訊號 (補足 n78 頻段不能在指定地點使用的問題)。
喺香港電訊業績報告，佢哋披露更多 csl / 1O1O 及 Sun Mobile 網絡新安排，包括了佢哋 700MHz (B28) 4G 訊號覆蓋、重點加強訊號嘅室內地方，而他們亦公佈了首個網絡商支援 5G CA，只要手機或 CPE 配合，就可以同時收到 n78 / n79 5G 訊號，好處是可以同一時間容納更多用家，同時在 5G 上網，與此同時，5G 上網最高速度亦可大幅度提升。下面三張業績簡報圖，已寫得更加淸楚。
csl. 700MHz B28 網絡的覆蓋圖
放大睇 csl 重點升級的室內覆蓋地方
支援 n78 / n79 ENDC 連結