嚟自美國加州嘅 Roger Anderson，佢自已有間公司叫做 Jolly Roger Telephone Company, 雖然叫電話公司，但其實係一間 App 公司。呢間公司，用咗 OpenAI 嘅 GPT-4 再配合 Bot 同埋換聲機械人，玩殘傳銷人員同電話騙子。呢嗰換聲機械人，會扮成真人咁同傳銷傾計，增加佢哋時間成本。
要課金，但收費唔貴
點玩呢？首先你要課金，每年美金 25 蚊，即係平均一個月 HK$27 左右，你就可以把懷擬詐騙或者廣告電話，Call Forward 到佢哋提供嘅服務號碼。然後，你可以畀 bot 處理廣告及詐騙來電。你有時間想聽下 ChatGPT Bot 點樣對付呢班大騙子，都可以進入網頁介面，聽番有幾攪笑。可以自己揀角色
呢個玩殘傳銷人員及騙子，運用咗 OpenAI GPT-4 嘅人工智能對話 Bot，有好多種「角色」同埋「性格」可以揀，例如「Whitey Whitebeard」就係一個好煩嘅老人家，佢會喋喋不休不聽講嘢，抱怨呢樣嗰樣。「Salty Sally」就係一位全職媽媽，可能因為囝囝成日嘈喧巴閉，會成日要傳銷人員「再講過」或者要求從新由頭開始再講。咁 ChatGPT 係呢個 AI 聲音機械人又係乜嘢角式？Jolly Roger 呢個玩殘傳銷人員嘅 bot，當聽到打來嘅人講嘢，用 OpenAI GPT-4 分析講者講緊咩，然後選擇跟主題相關嘅內容，再有不同嘅機械人角色去演譯。
大家可以聽吓下面有條 YouTube，因為係英文，記得開 CC 字幕，就會見到對話嘅英文即時傳譯。今次示範係用上超煩嘅「Whitey Whitebeard 」，聲音聽起嚟堅似真人類 (英文嘅 AI 聲，已經做得好似真人)，內容係詐騙電話，想套取收騙者嘅醫療卡號碼，其實嚴重程度，有啲似呃你嘅 Credit Card 號碼一樣。「Whitey Whitebeard 」唔單止煩，仲「九唔答八」，但因為有 OpenAI GPT-4 協助，有時又會講返好似答嘅騙子嘅答案，好笑程度媲美廿幾年前「軟硬天師」嘅整蠱電話。最後頂唔順嘅係嗰位騙子，Whitey Whitebeard 取得最後勝利。
按 1 定按 2，AI 一様攪得掂
你可能問，其實家陣最流行嘅詐騙電話，好多都係要先聽一段錄音，再要係鍵盤再揀數字，先會進入真人對話。呢個玩殘傳銷人員 Bot 會識別出呢點，會自動嘗試最常見嘅通行鍵，何謂十分聰明。可惜嘅係，Jolly Roger 呢個 ChatGPT 協助嘅玩殘詐騙聊天機械人，只適用於英美澳紐，講到 Open AI GPT 啦喎，當然唔會有香港份啦，但如果你都係對呢個 Bot 好有興趣，都可以 Click 佢哋官網研究研究。
ePrice.HK 同你齊齊玩 AI : 按呢度進入 AI 大時代專頁，每日送上最強 AI 消息及工具測試
玩咗 Threads 未！立即 Follow 我哋，有係網站睇唔到嘅科技癈文分享