喺不遠嘅將來，用緊 Android 手機嘅你，可以不加思索地，帶住手機衝上飛機。係飛機起飛前，查完 Email、覆了 WhatsApp 然後呼呼大睡！
喂......手機要 set 去 Flight Mode 或者熄咗佢架喎！Google 提出一項創新嘅發明，有可能改變我哋喺飛機上使用裝置嘅習慣，就係「智能切換飛行模式」！
手機＋平板＋手提電腦都用得到
而家嘅飛行模式有個問題，就係佢會斷晒所有無線連接，包括手機網絡、Wi-Fi 同藍牙。不過，而家好多飛機提供需要特定類型連接嘅服務，例如免費及收費 Wi-Fi 上網。可惜嘅係，而家嘅飛行模式並未能夠根據用家需要提供網絡連接嘅選擇配置。根據呢個專利，Google 開發咗一種先進嘅技術，可以自動檢測你何時登機，而且無縫咁將你嘅便攜式裝置，包括智能手機、手提電腦同埋平板電腦，切換到連接飛行模式 (Android 手機、平板、加 Chromebook ?) 即係話，你唔單止唔使手動開飛行模式，而且呢項技術都會根據可用服務自動調整。Google 嘅專利解決咗，家陣要用半 Flight Mode 嘅問題。
自動感應要著乜嘢連線功能
根據資料顯示，當你一上飛機，呢個技術，會令你手機等裝置，自動開連接飛行模式。而且，佢仲用各種感應器去改變你裝置上嘅無線連接同應用程式。例如，佢可以停自動備份、應用程式背景更新同埋應用程式更新，保證旅程上嘅 WiFI 唔駛處理咁多工作，令其他應用更加暢順無阻。感應器可以因應下列嘅改變，而調控操作：
環境因素（氣壓下降，加速度/速度）
艙內聲音（飛行引擎聲，高度提示聲）
飛機信標（超聲波信號）
無線電信號因素（GPS信號，手機ID，Wi-Fi信號）
其他因素（訂位活動，報到狀態）
值得一提嘅係，呢種技術支援不同嘅無線連接，例如藍牙同Wi-Fi。連接飛行模式可以根據可用網絡質量智能調整Wi-Fi 設定，確保穩定嘅連接。一段時間之後，佢可能會自動斷開連接以節省電池壽命。當你落飛機之後，呢項技術會將你嘅裝置無縫地切換返到正常模式，重新啟動手機網絡同恢復原來設定。不過，專利嘅嘢，今日申請咗，唔代表聽日會有，亦唔代表真係會有，亦可能下年度有，總之，我哋記住佢，有朝一日，坐飛機唔駛再理會乜嘢飛行模式就係了。
資料來源：parkifly.it