手機出貨量大跌 定價不跌
根據 IDC 嘅報道指出，2026 年全球智能手機市場嘅出貨量預測比想像中更差，按年跌幅由原本預期嘅 14% 大幅擴大到 16.7%，即係大約減少咗 2 億部手機出貨，而今年下半年嘅跌勢會最為嚴重。除咗出貨量大跌之外，最關乎用家利益嘅係手機定價。報告指出，手機價格上升嘅情況將會係「永久性」嘅。因為記憶體成本預計會一路升到 2028 年先至有得停，就算到咗 2028 年之後，平均售價每年亦只會回落大約 1% 至 2% 左右。換句話講，未來嘅新機定價只會越嚟越貴，幾百蚊嘅入門級手機亦會因利潤太低而買少見少。百元美金以下低階手機再見了
喺呢股成本壓力之下，低階手機市場正正面臨重大危機。上年出貨量龐大嘅百元美金以下低階手機正面臨淘汰，唔少 Android 品牌已經開始縮減呢類平價型號，將資源主力擺喺利潤較高嘅產品上面。喺 2026 年第二季，呢個板塊已經錄得接近六成嘅按年跌幅，預計下半年跌得仲快。高階手機抗跌力強
另一邊廂，高階市場嘅抗跌能力就明顯較好，尤其喺一啲成熟市場，靠住長期提供嘅零息分期付款方案，令銷情相對穩定。不過，新興市場嘅情況就無咁樂觀，預計今年跌幅會超過兩成。分析亦提到，未來 18 個月將會淘汰一啲營運困難嘅細品牌，當 2028 年記憶體供應穩定時，成個市場規模會縮細，但價值就會提高，平價手機時代亦正式宣佈完結。來源：9to5mac