想打沉 SUN Mobile ？Galaxy A8 在 CMHK 最平兩千有找
近日， CMHK 就推出左個「每月優惠之星」，而今個月就選左 Samsung 部 Galaxy A8 作為主角。叫得做「優惠之星」也就是說價錢有相當吸引力吧！的確，係今次 CMHK 優惠之中， Galaxy A8 個價錢真係好搶眼，只係 $1980 ，比起現時大鋪最平賣價 ＄2980 平足一千之餘，更加接近以半價賣機，版主到 CMHK 門市問價時更加聽到有途人大大聲話「嘩！平到咁嘅喂！」。但係 CMHK 「每月優惠之星」當中係有唔少細則值得大家留意的，而家再講講。CMHK 今次的 Galaxy A8 優惠，係宣傳海報上都寫得好清楚， $1980 機價為「簽約價」，版主問過，只有新上台或轉台的新用戶先可以用到呢個價，現有客戶要買機都只係得 $2980 呢個價，並沒有再平。如果想上台買機的話又甚麼要留意呢？首先，你要選用 4G Pro 6GB 或以上的服務計劃，需知道，係 1 月 10 號之後， CMHK 數據計劃已經加左價，當中 10GB Plan 係重災區。同時簽約年期都要選擇 24 個月，而且入手 Galaxy A8 將會扣除手機即時折扣限額。另外， Galaxy A8 個優惠只係做到 2 月 14 號，為期真係得一個月左右。
▲ Galaxy A8 呢個「跳樓價」近幾日先推出，莫非 A9 (2016) 推出後 A8 好快會清貨？
咁樣上台出 A8 又算唔算抵呢？版主都覺得好難講，唯有舉出其他對手做法來作比較。話說呢期 SUN Mobile 都用左 Galaxy A8 為「熱賣推介」，不過就唔算好抵，淨機都要 $3098 。而上台價方面，不論你係選「4G隨意用數據服務計劃」（限速 Plan）還是「4G隨時用數據服務計劃」，都要簽夠 24 個月才能以 $2698 呢個價錢出機。所以如果純以上台出機價錢來比較的話， CMHK 係會抵啲嘅，但 Galaxy A8 又值唔值得為左 $1980 呢個價錢而上台／轉台呢？又係另一個問題了。最後， Galaxy A8 既然能夠落到 $1980 呢個價位，我哋其實都可以指望當 Galaxy A9 (2016) 推出後， Galaxy A8 有機會出現清貨價呢！
▲ Galaxy A8 係 SUN Mobile 上星期就列為「熱賣推介」，話咁快 CMHK 就出個更震撼的「每月之星價」。
在文章發佈時，Samsung Galaxy A8 賣價為 $2998 ，按此看手機詳細規格及最新賣價。