三星舊代旗艦 蘇寧暗價 $4000 有找！妙法買 S10 三百蚊唔使，抵？

左定坤 (Cho Ting Kwan) 2019-04-05 14:16 | Samsung

昨日就分享過 LG、Sony、HTC S845 旗艦大舖減價，但好多網友就覺得減完都唔平，差不多價錢買 S855 旗艦仲好。又啱喎，四五千蚊其實都唔係平，$5298 都已經買到部三星 S10e，咁仲使乜買舊代 U 旗艦機？講到減價最進取的，唔計先前 Sony 果部 XZ2，三星舊代 Galaxy S9 蘇寧都賣到好平，唔單止落到 $4000 唔使，而且仲有一大堆贈品送，網友又覺得抵唔抵呢？睇下文啦！



最近行過旺角一間蘇寧，就見到豎住咗個牌，上面寫着 Samsung Galaxy S9 特價發售，詳情請向店員查詢。好奇心驅使下，版主就好聽話地去店員詢問，店員表示其實係多咗一大堆贈品送，又有 microSD 卡，又有無線喇叭，又有尿袋，又有 USB 線。而版主再進一步問及：即係無減價？店員細細聲同我講，其實佢哋可以做到 $3998。$3998 贈品送唔送？照送！聽完突然覺得，呢個價又幾抵喎！當晚去咗先達某店吹水，店主都話 S9 佢哋都要賣 $4000！



不過，如果唔想買舊旗艦，要買就買最新三星 Galaxy S10，有無計？版主咁問得，一定有！如果你用緊 iPhone X (256GB) 想轉會，去衛訊 Trade in 加 $298 就買到 $128GB S10；而如果由 iPhone XR (128GB) Trade in，就可以加 $698 買到。另外，iPhone 8 用家都唔使愁，如果你果部係 256GB 版本，Trade in 加 $898 都買到部 S10e，平平地換新機都是一個不錯選擇。你又點睇？