Honor Magic Vs 平價推出，三星有壓力？網絡商將摺芒機 Z Flip4 / Z Fold4 減價至 $4998 起

左定坤 (Cho Ting Kwan) 2023-06-02 20:19 | Samsung

曾幾何時，華為係三星一個好大嘅競爭對手，但自從中國畀美國制裁，華為無 Google 用，又無 5G，慢慢三星喺 Android 手機市場上獨大，無乜邊個品牌可以撼動佢嘅地位。不過，雖然華為而家無咗 Google 同 5G，但就派咗同佢「脫離關係」嘅阿仔 Honor，去同三星撼過，好似最近就推出一部萬元有找嘅大芒摺機，而且擺明係以三星作為假想敵，相信都會畀到三星一啲壓力，隨即 SmarTone 就將 Galaxy Z Fold4 同埋 Galaxy Z Flip4 摺芒手機減價，最平 $5000 有找！想知點做到，睇下文啦！

SmarTone「特選客戶價」$4998 起入手三星摺芒機

說的是 SmarTone，不過今次講嘅係「特選客戶價」，乜嘢叫「特選客戶價」呢？點樣先做到所謂「特選客戶」？版主問過，原來只要 SmarTone 現有客戶簽 12個 月期限嘅銷售及服務合約，便可以「特選客戶價」購買智能手機，其中最近有減價嘅，包括咗有三星 Galaxy Z Fold4 (512GB) 以及 Galaxy Z Flip4 (256GB)，前者由原來嘅 $11198 減至 $9998 (建議零售價 $15598)，而後者則由原來嘅 $5998 減至 $4998 (建議零售價 $8298)。

如果想知道自己係咪合資格買，方法都好簡單，只要上去 SmarTone 網上商店，揀返 Galaxy Z Flip4 或者 Galaxy Z Fold4 嘅頁面，撳返「現有客戶價」，然後「查閱優惠」，入返 SmarTone 電話號碼，就可以知道自己係咪合資格用「特選客戶價」去買呢兩款手機。

呢個價錢，如果你係 SmarTone 現有客戶，又會唔會考慮入手呢？





按這裡有三星 Galaxy Z Flip4 詳細規格及最新賣價
按這裡有三星 Galaxy Z Fold4 詳細規格及最新賣價