Samsung 發佈全新 Flex Titanium 技術  Fold8 Ultra 應該會用

左定坤 (Cho Ting Kwan) 2026-07-15 12:49 | Samsung

三星電子今日正式發佈專為新一代 Galaxy 摺疊屏幕手機研發的全新 Flex Titanium 技術。這項技術是繼過去七代產品研發後，針對屏幕結構與物料進行的重大革新，旨在進一步提升摺疊屏幕的耐用度，並大幅減輕屏幕摺痕，令用家睇屏幕時可以有更完美嘅體驗。

技術核心：鈦金屬與精密工程設計

Flex Titanium 技術嘅靈魂在於兩大鈦金屬核心組件：鈦合金薄膜（titanium-alloy film）與鈦金屬支撐板（titanium plate）。Samsung 成功將呢種以堅硬見稱嘅金屬，融入摺疊屏幕極纖薄嘅結構入面。

鈦合金薄膜位於 OLED 面板下方，代替咗傳統嘅聚合物薄膜，提供咗高出 20 倍嘅機械硬度。透過精密嘅捲壓工藝，呢層薄膜厚度只有人類頭髮直徑三分之一咁薄，確保咗顯示面板設計可以保持纖薄。喺薄膜下方，則採用咗鈦金屬支撐板。透過特殊嘅孔洞加工技術，呢塊支撐板可以消除屏幕同支撐板之間嘅空氣間隙，同顯示模組更加緊密貼合。當手機展開嗰陣，呢種結構可以為屏幕底部提供更穩固嘅支撐力；而摺疊嗰陣，又依然保持到極高嘅柔韌性。

提升能源效率與觀感

除了結構嘅強化，Samsung 喺呢次技術更新入面亦整合咗高解像度顯示架構同新一代有機材料。呢個調整令屏幕色彩更加鮮明，同時有效降低用電量，提升裝置嘅能源效率。

開創摺疊體驗新基準

Samsung 喺過去七代摺疊屏幕手機嘅研發路途上，一直觀察用家需求，了解到用家渴望擁有更廣闊、更沉浸嘅視覺享受，同時又希望減輕屏幕摺痕，而且唔想犧牲裝置嘅耐用度同便攜性。Flex Titanium 技術正是為咗滿足呢啲訴求而誕生。呢項新技術將會喺 Samsung 新一代 Galaxy 摺疊屏幕裝置中，可能是 Samsung Galaxy Z Fold8 Ultra 中首次登場，具體表現好令人期待。有關裝置嘅更多詳細規格同功能，將會喺嚟緊嘅 Galaxy Unpacked 發佈會上正式揭曉。