摺機不重
對好多想換摺機嘅朋友嚟講，拎上手手感如何往往係關鍵考慮。根據研調機構 YouGov 喺 2024 年做嘅調查顯示，機身太過論盡笨重，係好多消費者唔打算入手摺機嘅主要原因；而對於認真考慮緊買摺機嘅用家，電量、耐用度同埋屏幕質素就係三大關鍵。回顧 Samsung 摺機嘅演進過程，2019 年第一代 Galaxy Fold 重達 276 克、摺埋有成 17.1 毫米厚。之後 Galaxy Z Fold5 減到 253 克，Galaxy Z Fold6 再減到 239 克；去到 Galaxy Z Fold7，機身重量落到 215 克，成功輕過當時直板旗艦 Galaxy S25 Ultra 嘅 218 克。而最新嘅 Galaxy Z Fold8 再進一步打破紀錄，重量壓到得番 201 克，厚度只有 8.9 毫米，足足比 Galaxy Z Fold5 輕咗 52 克咁多。
三大關鍵技術突破
今次可以減得咁誇張，主要係依靠三大關鍵技術突破：● 第一項突破在於超精密機械結構同屏幕工藝。要將機身做薄做輕，同時又要維持機身強度，工程要求極度嚴格。Galaxy Z Fold8 同 Galaxy Z Fold8 Ultra 採用咗 Flex Titanium 技術，加入專為摺疊結構而設嘅鈦合金薄膜（Titanium Alloy Film）。呢層薄膜厚度只有幾十微米，大概只得人類頭髮直徑嘅三分之一。支撐屏幕嘅金屬板經過多重複雜工序加工，最薄嘅位置只有 0.15 毫米，整體厚度亦維持喺 0.2 毫米左右，確保金屬喺極薄狀態下都唔會變形，維持屏幕平整。鉸位方面亦唔係單純將上一代零件縮細，而係針對唔同嘅機身形態重新設計，令每次開合嘅受力可以平均分散到機身唔同位置。
● 第二項突破係新材料嘅應用同散熱架構。機身邊框採用咗升級裝甲鋁（Advanced Armor Aluminum），兼顧輕量化同保護力。機背位置就用咗複合金屬材料，喺超薄結構入面同時兼顧散熱同減重。講到散熱，由於機身變薄令內部空間變細，工程團隊特別選用咗導熱效能更高嘅石墨散熱片。以體積同 Galaxy Z Fold7 差唔多嘅 Galaxy Z Fold8 Ultra 為例，內部嘅石墨散熱層體積增加咗大約 7%，確保高效能運行嗰陣依然穩定。
● 第三項突破就係以 0.001 克為單位嘅極限微調。工程團隊深入檢視咗成部機大約 270 個核心組件同埋超過 180 種輔助零件，將調校精度推到 0.1 毫米甚至 0.001 克嘅級數。團隊喺入面直接篩走咗 15 種唔必要嘅輔助零件，其餘 170 幾種零件就逐一修改形狀同邊位，甚至將多個部件合二為一。電路板（PCB）嘅線路經過精簡，磁通通道（Magnetic Flux Channel）天線亦重新調整排列，減少零件之間嘅重疊，用盡內部每寸空間。
透過呢啲微調慳出嚟嘅空間同重量，令手機可以塞入更強嘅硬件。好似 Galaxy Z Fold8 Ultra 咁，喺維持 215 克嘅重量下，電池容量由 4,400 mAh 升級到 5,000 mAh，同時仲放入咗 2 億像素主鏡頭同埋系列首次加入嘅 5,000 萬像素超廣角鏡頭。