LG G3 大鋪終跌落二字頭，仲抵過 15 年大廠中階機？
LG 今年未有係香港推出過定價 3-4 千的中高階手機，當中原因不難理解，因為上年旗艦 G3 一直都有不少人留意，分分鐘而家仲好賣過其他大廠中階機。不過，近幾個月 LG 係行貨方面其實不是大家想像中的劈價不斷，好似 G4 係 7 月中就減到 $4698 ，到而家十月尾 V10 係香港都快開賣了，都仲係 $4698 ，而 G3 都係 7 月尾後一直維持係 $3298 呢個價錢。係規格上雖然 G3 有 2K 芒，但係 Qualcomm S801 處理器配 3GB RAM 以及 32GB 內置容量，以及 1300 萬像素的雷射自動對焦鏡頭，呢部份的規格同 G4 比都有段距離， V10 都出埋 G3 自然係價錢上就要再減了。係大鋪方面 G3 而家跌落 $2998 呢個價位，雖然只係減左 $300 ，但總算跌穿三千呢個價位。如果想搵更平的行貨機的話，深水埗賣 LG 行貨的細鋪都減左價，最平係 $2598 比大鋪再平多 $400 ，大家又覺得抵唔抵？
▲今次 G3 減到 $2998 相信係 LG 主動減價的，因為多間大鋪都即時將 G3 的價錢調整了。
▲深水埗有細鋪將 G3 減至 $2598 又算唔算抵玩？
Sony Xperia Z3 大鋪有暗價，一減就減足 $700
先前同大家分享過 Xperia Z3 係大鋪輕輕的減左三百蚊，但過左幾日個價錢又忽然反高潮地回升到 $3998 ，教人驚訝。不過，過左一陣子後有網友就提過原來有大鋪實際上用緊「暗價」去賣，而且減得更勁！版主早排到左北京無法即時證實，但後來就收到風，指出其實 Xperia Z3 真係有「口價」，即係向店員查詢會有折。 Xperia Z3 單雙卡版在衛訊的實際賣價其實係 $3298 ，比其現時標價 $3998 平足 $700 ，如果想要分期的話其實都可以減，不過價錢就會貴少少，要 $3598 。同 LG G3 相比，兩者一樣係上年用上 Qualcomm S801 的旗艦，口碑亦都唔錯。 G3 以雷射對焦鏡頭同可換電做賣點，而 Z3 就以防水同電池續航力出色來贏取用家歡心，所以在 HTC 、 Samsung 都紛紛抽起上年旗艦唔賣的情況下， G3 同 Z3 現在都仍然有朋友表示有意入手。唔知大家又覺得今次大鋪減價有無睇頭呢？留言講講吧。（更新：有網友提醒在衛訊入手 Z3 會多送 Sony SBH20 耳機）
▲ Xperia Z3 係衛訊而家都仲係標緊舊價 $3998 ，但如果大家查詢店員的話，賣錢就會有減。
▲ 係百老匯方面， Z3 就直接標價 $3498 。
在文章發佈時，LG G3 賣價為 $2998 ，按這裡有更詳細規格及賣價。
在文章發佈時， Sony Xperia Z3 賣價為 $3298 ，按此看詳細規格及最新賣價。