賤價買 LG Wing 係機會？LG 全球手機業務正式玩完

左定坤 (Cho Ting Kwan) 2021-04-05 13:32 | LG

講到 LG，其實版主我覺得有啲可惜，當然其中一個原因，係佢早早就撤出香港手機市場，但更大嘅原因，係版主我對撤出香港手機市場後推出嘅 LG Wing 很感興趣。前排去記招，聽到有行家講起，話而家部 Wing 分分鐘 $4000 唔使就買到，聽落好吸引，然而今日有一單大消息，會唔會令 LG Wing 有望賤價買得到？睇下文啦！



是咁的，LG 官方今日確認，會在 2021 年 7 月 31 日結束全球手機業務，換句話說，LG 手機終於真正意義上收皮。見到有朋友 Facebook 表示，復活節先搞咁嘅嘢，唔通搏復活咩？LG 手機未來復唔復活到，我唔知，但 LG 手機已死，呢個係不爭事實。

而家 LG 全球手機業務玩完，你估下現有 LG 手機，會唔會極速跌價，可以用賤價入手呢？版主我好期待可以 $3000 唔使買到 LG Wing！但似乎並唔會如我所願，因為版主同深水埗細舖問過，而家 LG 收皮，手機價錢只會升，唔會跌咁話喎。到底我幾時先可以出手買新機呢？